​АҚШ елшілігі азаматтарын Ирактан кетуге шақырды

АҚШ-тың Багдадтағы елшілігі тағы да Иракта жүрген америкалық азаматтарға елден дереу шығуды ескертті. 

Дипмиссияның хабарламасында Иранмен байланысты қарулы топтар алдағы 24–48 сағат ішінде Багдад орталығында шабуылдар ұйымдастыруы мүмкін екені айтылған, деп хабарлайды АА.

Елшілік мәліметінше, ықтимал нысандарға америкалық азаматтар, компаниялар, университеттер, дипломатиялық мекемелер, энергетикалық инфрақұрылым, қонақүйлер, әуежайлар, сондай-ақ ирактық мемлекеттік және азаматтық объектілер кіруі мүмкін. Сонымен қатар америкалықтарды ұрлау қаупі бар екені ескертілді.

Дипмиссия Ирак үкіметінің мұндай шабуылдардың алдын алуға қауқары жетпейтінін атап өтті. Кейбір қарулы топтар билікпен байланыста болуы мүмкін, ал жекелеген адамдар үкімет қызметкері ретінде жалған құжаттарды пайдалануы ықтимал.

Елшілік қызметкерлерінің бір бөлігі эвакуацияланғанына қарамастан, АҚШ миссиясы жұмысын жалғастырып отыр. Алайда азаматтарға Багдадтағы елшілікке немесе Эрбильдегі консулдыққа бармауға кеңес берілді.

Иракқа қатысты төртінші деңгейдегі сапар ескертуі күшінде қалып отыр: «Ешқандай себеппен Иракқа бармаңыз. Егер сонда болсаңыз, дереу елден шығыңыз», – делінген хабарламада.

Бұл соңғы күндері АҚШ елшілігінің азаматтарға жасаған екінші осындай үндеуі.

Бүгін, 22:41