АҚШ өз азаматтарын Ираннан кетуге шақырды

АҚШ өз азаматтарын Ираннан кетуге шақырды. Құрама штаттардың мемлекеттік департаменті Ислам Республикасындағы ауқымды наразылықтар, интернетті бұғаттау және жолаушылар көлігі қозғалысының шектелуіне байланысты осындай мәлімдеме жариялады. 

Америкалық ведомство Иран аумағынан Армения немесе Түркиядағы құрлық шекаралары арқылы шығуды ұсынды. Өйткені әуе компаниялары рейстерді тоқтатып жатыр. Мәселен, немістің Люфтганза компаниясы Иранмен әуе қатынасын 28-ші қаңтарға дейін тоқтатты. Austrian Airlines, Turkish Airlines және Flydubai да осындай шешім қабылдады. АҚШ пен Иранның қос азаматтығы бар тұрғындарға Иран төлқұжаттарын пайдалануға кеңес беріледі. Өйткені Тегеран қос азаматтықты мойындамайды және америкалық құжатты ұсынғандар қамалуы мүмкін. Ал мемлекеттік департамент АҚШ-тың Иранмен дипломатиялық және консулдық байланысы жоқ екенін атап өтті. Тегеранда Құрама Штаттардың мүдделерін Швейцария қорғайды.