АҚШ пен Иран делдалдар арқылы жаңартылған бейбітшілік жоспарын талқылайды

Қатарлық делдалдар дүйсенбі немесе сейсенбі күні Нью-Йоркте Иран сыртқы істер министрі Аббас Аракчимен және америкалық тараппен жеке келіссөздер өткізуі мүмкін. Бұл туралы соғысты тоқтатуға бағытталған жаңа талпыныс аясында келіссөздер барысымен таныс ресми өкіл мәлімдеді, деп хабарлайды Tengrinews.kz Reuters агенттігіне сілтеме жасап.

Иран мен АҚШ арасындағы делдалдар арқылы жүретін келіссөздер дүйсенбі күні Нью-Йоркте өтеді деп күтіледі. Онда өткен аптада БҰҰ Бас Ассамблеясы аясында Тегеран ұсынған жеті күндік ұсыныстың өзгертілген нұсқасы талқыланады, деп хабарлады атын атағысы келмеген шенеунік.

Иранның ISNA агенттігі Иран сыртқы істер министрінің орынбасары Нью-Йорк уақытымен таңертең делдалдармен кездесетінін растады. "Екі тарап ағымдағы жағдайға қатысты соңғы ұсыныстар мен пікірлерді қарастырады", - деп хабарлады ISNA.

Бұған дейін АҚШ президенті Дональд Трамп Тегеранға жасалған экономикалық қысымды алға тартып, Иранның ұсынысынан бас тартқанын хабарлаған болатын. Алайда жексенбі күні Axios басылымына берген сұхбатында ол осы аптада америкалық келіссөзшілермен байланыс жалғасады деп күтетінін айтты.

Аракчидің айтуынша, Иран делдалдардан АҚШ-тың бас тартуы туралы "ресми түрде хабарлама алған жоқ" және келесі қадамдарды айқындамас бұрын Вашингтонның түпкілікті ұстанымын күтеді.

"Біздің шарттарымыз айқын және Ормуз бұғазының жұмысын қайта бастау бойынша кез келген қадам осы шарттардың орындалуына байланысты", - деді ол. Сондай-ақ ол тығырықтан шығудың жалғыз жолы келіссөздер екенін атап өтті.

Иранның жеті күндік жоспары Иран мен Ливандағы барлық әскери қимылдарды тоқтатуды, миллиардтаған долларлық активтерді бұғаттан шығаруды, ирандық мұнайға салынған санкцияларды алып тастауды және АҚШ тарапынан Иран порттарын ашуды қарастырады. Бұған жауап ретінде Тегеран бір аптадан кейін Ормуз бұғазының жұмысын қайта бастауға рұқсат береді, содан кейін тараптар ядролық бағдарлама бойынша келіссөздерге қайта оралады.

Бізді Google-дың негізгі дереккөздер тізіміне қосыңыз