АҚШ та қазақтың көк туы желбіреді

Америка қазаққа құрмет көрсетті. Нью-Йорк төрінде көк туымыз желбіреді. Алып шаһар мэрі Эрик Адамс еліміз бен Нью-Йорктің мәдени байланысы құрметіне Қазақстан мұрасын дәріптеу күнін жариялады. Салтанат Манхэттен қаржы орталығында өтті. 

Қысы біздегіден кешірек келетін Нью-Йорктің қазіргі желді күні Астананың күн райын еске салады. Көңіл күй де қазақы. Қала мэриясы мен Нью-Йорк фильм академиясының өкілдері, қарапайым америкалықтар да қазақстандықтармен бірге шаһардың ең алғашқы саябағына жиылды. Бәрінің күткені - Қазақстанның республика күніне орай көк байрағының көтерілетін сәт. 

Нью-Йорктың ең танымал орындарының бірінде қазақ гимні шырқалып, туымыздың биіктен желбіреуіне дәл осы күннің Қазақстан мұрасын дәріптеу күні болып жариялануы себеп. 

Чарьл Даймонд, Нью-Йорк қаласы мэриясының халықаралық қатынастар бойынша консулы:

- Бұл шара біз үшін де аса маңызды. Дәл осы тарихи саябақ алаңында революция кезінде АҚШ туы да алғаш рет желбіреген. Міне биыл үшінші жыл қатарынан Қазақстанның көк туын да көтеріп жатырмыз. Қаламыз бен Қазақстанның тығыз байланысын ғана емес, Нью-Йоркте тұрып жатқан қазақтардың да мәртебесін ұлықтап отырмыз. Шаһарымыз Қазақстаннан шыққан өнерпаздар мен спортшылардың, мықты азаматтардың еңбегіне, жемісті жолына куә. 

Мерекеде әйгілі Карнеги холда өнер көрсеткен Гүлзар Габман халық әнін шырқады. Ал домбыраны тартып қана қоймай, америкалықтарға үйретіп жүрген Джефф Герш Әбдімомын Желдібаевтың “Еркесылқымы” мен Құрманғазының “Адайын” күмбірлетті. 

Джефф Герш, музыкант:

- Осы күйлерді тартып отырғанда далада құйғытып бара жатқан сәйгүліктер көз алдыма келеді. Құдды бір Қазақстанға тап бола қалғандай әсер аламын және осы орайды пайдаланып өздеріңізді Республика күнімен құттықтаймын. Домбыра тартып, қолдауларыңызды сезіну мен үшін үлкен құрмет! 

Гүлзар Габман, әнші:

- Бүгін аса тарихи күн. Себебі алдымызда Республика күні келе жатыр. Республика күніне орай Уолл Стритте Қазақстанның туы көтерілді. Осыған өзімнің екі әнімді “Дударай” мен “New York, New York” әндерін айтып, халықтың қошеметіне бөленіп жатқаныма өте бақыттымын. 

Көк туымыздың осылай желбіреп, Нью-Йорк күнтізбесінде Қазақстанның меншікті күнінің болуы отандастырымыздың ерен еңбегінің жемісі. Ал бұл қос елдің ынтымақтастығын берік ете түседі. 

Авторы: Ердана Ержанұлы