АҚШ визасына 15 000 доллар кепіл төлейтін елдер тізімі 50 ге дейін көбейді

Жаңа ережеге сәйкес, аталған 50 елдің азаматтары туристік және іскерлік B1/B2 визаларына өтініш берген кезде 15 000 долларға дейін кепіл жарнасын төлеуі тиіс.

Бағдарламаға жаңадан енгізілген 12 ел: Грузия, Моңғолия, Маврикий, Камбоджа, Эфиопия, Гренада, Лесото, Мозамбик, Никарагуа, Папуа — Жаңа Гвинея, Сейшел аралдары және Тунис. Бұған дейін бағдарлама негізінен Африка елдерін қамтыған 38 мемлекетті қамтыған, олардың қатарында Алжир, Бангладеш, Ботсвана, Куба, Нигерия, Замбия және басқа елдер бар.

Кепіл жарнасы өтініш берушіге виза берілмеген жағдайда немесе ол АҚШ-та болу талаптарын толық сақтаған кезде қайтарылады. Мемлекеттік департаменттің мәліметінше, бұл шара визаның мерзімі аяқталғаннан кейін елде заңсыз қалып қоятын шетелдіктер санын азайтуға бағытталған.

Дональд Трамп әкімшілігі қатаң иммиграциялық саясат жүргізіп келеді. Оның аясында депортациялар, визалар мен грин-карталарды жою, сондай-ақ иммигранттардың әлеуметтік желілерін тексеру шаралары жүзеге асырылып отыр.

Құқық қорғаушылар бұл бағдарламаны азаматтардың құқықтарын шектейді деп сынға алса, билік өкілдері оны ішкі қауіпсіздікті қамтамасыз етудің тиімді құралы деп санайды.

Өткен жылдың маусым айында АҚШ ұлттық қауіпсіздікке байланысты 19 елдің азаматтарына елге кіруге тыйым енгізген.

Елдердің толық тізімін мына жерден көре аласыз.

Бұған дейін АҚШ Орталық Азияның үш елінің азаматтарын да визалық кепіл бағдарламасына енгізгені хабарланған еді. Сонымен қатар АҚШ H-1B бейиммиграциялық жұмыс визасын алу үшін 100 мың доллар көлемінде алым, ал «Трамптың алтын картасы» арқылы тұрақты тұруға рұқсат алу үшін 1 миллион доллар талап енгізген.

Сондай-ақ АҚШ 100 мыңнан астам визаның күшін жойды.