Ақтауда республикалық ата аналар форумы өтті

Ақтауда республикалық ата-аналар форумы өтті, деп хабарлайды 24KZ. Оған Парламент Мәжілісінің депутаттары, танымал ұстаздар мен психологтар қатысты.

Форум тақырыбына мектеп пен ата-ана арасындағы байланысты нығайту, жасанды интеллект дәуірінде жаңа мүмкіндіктерді игеру тақырыбы арқау болды. Өскелең ұрпаққа интернеттен төнетін қауіптің алдын алу жолдары талқыға түсті. Депутаттар өзекті мәселелер бойынша заңға өзгерістер енгізу жайын да тілге тиек етті.

Еділ Жаңбыршин, ҚР Парламенті Мәжілісінің депутаты:

- Жан-жақтан келіп жатқан ақпараттық шабуылдар бар. Бұл әдейі жасалып жатыр ма, ол әлде біздің әлсіз тұстарымыздан өтіп кетіп жатыр ма? Осыны арнайы мамандар, сарапшылар бақылап қарап, өзіміздің жас ұрпақты қорғайтын иммунитет қалыптастыруымыз керек. Бала тәрбиесімен қатар мұғалімдердің де рухани жетілуіне мемлекет жағдай жасауы керек.

Аида Ертілеуова, қала тұрғыны:

- Бала үйде қамқоршылық ала алмаса, ол сырттан, достарынан іздейді. Сол себепті біз ата-ана әрқашанда қамқоршылықты бөлісе отырып, мұғалімдермен тығыз байланыста отыруымыз керек. Баланы психологиялық қолдау ретінде болып жатқан форум деп ойлаймын.