Ақтөбе қаласы әкімі аппаратының бұрынғы басшысы қайдан сот алдында жауап береді

Ақтөбе қаласы әкімінің аппарат басшысы қызметін атқарған Нұрсұлтан Исембайұлына Қылмыстық кодекстің «Алаяқтық» бабы бойынша айып тағылды. №2 Ақтөбе қалалық соты былтыр наурызда ақтау үкімін шығарды. Тіпті Н.Исембайұлы заңсыз жауапқа тартылғаны үшін шығынды өндіріп алуға құқылы болды. Сол жылы маусым айында Ақтөбе облыстық сотының қылмыстық істер жөніндегі сот алқасы істі апелляциялық сатыда қарап, №2 Ақтөбе қалалық сотының үкімін өзгеріссіз қалдырды.

Іс материалына сүйенсек, Кассациялық сотта ҚР Бас прокурордың орынбасары Әсет Шындалиев сот актісінің күшін жойып, қылмыстық істі сот талқылауына қайта жіберуді сұрады. Прокурор сот тергеуі толық жүргізілмеді және дәлелдер толық негізге алынбады деп санайды. Ал ақталып шыққан Нұрсұлтан Исембайұлы шағымды қараусыз қалдыруды сұрады. Кассациялық сот прокурордың өтінішін қанағаттандырды.

Айта кетейік, Нұрсұлтан Исембайұлы Ақтөбе қаласы әкімі аппаратының басшысы қызметін атқарып жүрген кезде, яғни, 2022 жылы Салтанат Сабырова жер алмақ болып Б.Олжагерееваға өтініш айтады. Екеуі де Ақтөбе қалалық тиімді даму орталығының қызметкері. Айыптау актісіндегі дерекке сүйенсек, Нұрсұлтан Исембайұлы өз қызметтік кабинетінде Б.Оржагереевадан 3 млн теңге алған. Сөйтіп С.Сабыроваға жер учаскесін бөлуге келісім жасалған. Алғашқы сотта Н.Исембайұлы 2022 жылдың 27 қыркүйегі күні жұмыс орнында болмағанын, айыптау актісі тек Б.Олжагереева мен куәгер С.Сабырованың сөзіне құрылғанын айтты. Телефон нөмірі мен ондағы хабарламалар көшірмесі дәлел бола алмайтынын айтып, ақталды. Кассациялық сот қылмыстық істің материалын қарап, сот отырысының аудиосын тыңдап, прокурор шағымын негізді деп таныды.

Іс Ақтөбе облыстық сотының қылмыстық істер жөніндегі сот алқасында қайта қаралады. Сот алқасының құрамы алғашқыдан өзге болады. Ал Нұрсұлтан Исембайұлы ешқайда кетпеу туралы қолхатпен бостандықта жүреді.

Еске салсақ, Ақтөбеде алаяқтығы үшін айыпталып жатқан депутаттар бас бостандығынан айырылуы мүмкін. Жарыссөзде прокурор екі депутатты 6 жыл 8 айға бас бостандығынан айыруды сұрады. Сот үкімі ертең шығады.