Ақтөбеде Экономикалық тергеу департаментінің офицерлері мен олардың құрбаны сотталып жатыр

Ақтөбеде сценарийі киноға бергісіз сот процесі басталды. Сотталушылар орындығында Экономикалық тергеу департаментінің (ЭТД) екі жоғары лауазымды қызметкері — Ермек Махамбетов пен Дәулет Сарин отыр. Оларға кәсіпкер Ерлан Бокушевтен 50 миллион теңге талап етті деген айып тағылуда. Алайда, бұл оқиғаның ең қызықты тұсы — қазір темір тордың арғы жағында ақша сұрағандар да, оны берген адам да отыр, деп жазады hronika.kz.

Бәрі ЭТД Бокушевтің «EL Quaty» кооперативін қаржы пирамидасын құрды деп күдіктенуінен басталған. Тергеу нұсқасы бойынша, подполковник Махамбетов істе нақты дәлелдердің жоқ екенін, тіпті жәбірленушілердің есімдері мен шығын сомасының орнына жай ғана көпнүкте қойылғанын түсінген. Бірақ офицерлер істі жабудың орнына, осы жағдай арқылы пайда табуды көздеген.

Кәсіпкерге қатты қысым көрсетілген: ол өзінің 10 жылға, әйелінің 8 жылға сотталатынымен, тіпті ұлының да жауапқа тартылатынымен қорқытылған. Қысымды күшейту үшін полицейлер соттың рұқсатынсыз компанияның барлық қызметкерлерінің, тіпті олардың ата-аналары мен балаларының да шоттарын бұғаттап тастаған.

Бопсалау әдістері де ерекше болған. Бірде тергеуші жауап алу кезінде компьютерде «мәселені тезірек шеш» деген сөзді жазып, Бокушевке көрсеткен де, бірден өшіріп тастаған. Тағы бірде соманы жай ғана қағаз қиындысына жазып берген. Нәтижесінде кәсіпкер келіскен, бірақ ҰҚК-ге (КНБ) арызданған. Департаменттің автотұрағында 50 миллион теңгені алып жатқан жерінде делдал қолға түсті.

Алайда бұл хикая мұнымен аяқталған жоқ. Пара бойынша тергеу жүріп жатқанда, Қаржылық мониторинг агенттігі Бокушевтің компаниясын бәрібір қаржы пирамидасы деп таныды. Оған 1,5 мыңнан астам адам ақша салып, шығын көлемі 7 миллиард теңгеге жуықтағаны анықталды. Соның салдарынан «жәбірленушінің» өзі де қамауға алынды. Енді сот бұл оқиғада кімнің кінәсі ауыр екенін анықтайды: бопсалаушы офицерлер ме, әлде алып пирамида құрған кәсіпкер ме?

Бүгін, 17:48