Ақтөбеде Junior Skills кәсіби шеберлік байқауы өтті

Жұмысшы мамандықтарын насихаттауға бағытталған сайысқа оқушылар қатысты.

Жеткіншектер тұрмысты автоматтандыру, электроника және инженерлік графика бағыттары бойынша сынға түсті.

Қайсар Жайлыбаев - дарынды балаларға арналған мектеп-лицейінің тоғызыншы сынып оқушысы. Білім ордасында математика, физика пәні тереңдетіліп оқытылады. Сондықтан сабақтан тыс сағаттарда электр құрылғыларын зерделеп, ток жүргізу әдістерін үйренген.

Қайсар Жайлыбаев, оқушы:

- Бізге осы тақтадан беретін кернеулікті анықтау керек болады. Анықтау үшін вольтметр болғасын паралель қосуымыз керек. Оны қосу үшін енді ойлану керек. Лицейімізде қосымша осындай сабақтар өткізіледі. Арнайы сағаттар арналады. Біздің сыныпта өткен тәжірибеміз болған еді. Сол тәжірибеден кейін менің қызығушылығымды туғызған еді. Қосылды. Енді оны тумблер арқылы істеймін.

Шеберлер сайысы «Ақылды үй технологиясы», «Электроника», «Инженерлік графика» құзіреттіліктері бойынша өтті. Оқушылар кәсіби бағдарламалар көмегімен ғимарат сұлбасын сызып, электр желісін жүргізіп, тұрмыстық бұйымдарды автоматты жүйеге тоғыстыруы тиіс. Бұл JasSkills және WorldSkills байқауларының ең қарапайым тапсырмалары қатарынан.

Дархан Шамбаев, жоғары политехникалық колледжінің бөлім меңгерушісі:

- Олар болашақта біздің талапкерлерге айналуы әбден мүмкін осы жарысқа қатысу арқылы. Бізден мамандықты жалпылама сипаттаймыз ғой, видеодан көрсетеміз жалпылама айтамыз. Ал бұл жерде нақты қолмен жасап көргеннен кейін бала мүмкін осы менің мамандығым деп білуі мүмкін, болмаса бұл менікі емес деп түсінуі мүмкін. Бұл жерде әрине достық сайыс. Бұл жерде бала бір жаңынан тәжірибе жинайды десек болады.

«Junior Skills» сайысы өңірдегі арнайы оқу ордаларының «Технологиялық процестерді автоматтандыру және басқару» бірлестігі апталығы аясында ұйымдастырылған.

Мансұр Есқожин, Айнадин Молдабеков, Айбек Даутов