Ақтөбеде төрт адамның өмірін қиған жол апаты бойынша шетелдік азамат ақталды

Ақтөбе облысының қылмыстық істер жөніндегі мамандандырылған ауданаралық соты «Самара – Шымкент» тас жолындағы ажалды апат ісі бойынша Қырғызстанның 33 жастағы азаматы Рамазан Инфуровты ақтады, деп хабарлайды Arasha.kz.

Қайғылы оқиға 2023 жылдың 21 ақпанында кешкісін автожолдың 921-шақырымында болған. Іс материалдарына сәйкес, Инфуров басқарған Volvo жүк көлігі Mitsubishi Montero Sport автокөлігімен соқтығысқан.

Жол апаты салдарынан 31 жастағы ер адам мен оның екі кішкентай баласы қаза тапты, тағы бір бала кейінірек ауруханада қайтыс болды. Олардың барлығы жеңіл көліктің ішінде болған. Көлікті қаза тапқан ер адамның 32 жастағы жұбайы басқарған. Ол аман қалды.

Бастапқыда жол қозғалысы ережелерін бұзып, абайсызда екі немесе одан да көп адамның өліміне әкеп соқтыру (ҚР ҚК 345-бабы 4-бөлігі) бойынша айып әйелге тағылған болатын. Алайда ол өз кінәсін мойындамай, өз жолағымен келе жатқанын, ал қарсы бағытта бензин тасушы көлікті басып озбақ болған жүк көлігі оны шұғыл тежеуге мәжбүр еткенін айтты. Осыдан кейін көлік тайғанап, соқтығыс болған.

Сот айыптаушы тарап әйелдің кінәсін дәлелдейтін бұлтартпас айғақтар келтірмегенін көрсетіп, жесір қалған әйелді ақтады.

Осыдан кейін дәл осы айып бойынша жүк көлігінің жүргізушісі Рамазан Инфуров сотқа тартылды. Ол да өз кінәсін жоққа шығарып, басып озуды аяқтап, өз жолағына қайтып оралғанын, ал жол талғамайтын көліктің қарсы бағытқа тайғанап шығып кеткенін алға тартты.

Іс алқабилердің қатысуымен қаралды. Қорғаушы тарап жүргізушінің кінәсін дәлелдейтін айғақтардың жоқтығын мәлімдеді.

Сонымен қатар, материалдар сотқа жіберілгенге дейін қылмыстық іс төрт рет тоқтатылғаны және сотқа дейінгі тергеу материалдарының бір бөлігі бұрын ақталған әйелге қатысты іс материалдарымен сәйкес келетіні атап өтілді.

Талқылау қорытындысы бойынша сот Инфуровтың әрекетінде қылмыстық құқық бұзушылық құрамының болмауына байланысты оны ақтады және оның қылмыстық жауапкершілікке заңсыз тартылуына байланысты зиянды өтету құқығын таныды.

Сот оны қамаудан дереу босатуға және күзетпен ұстау түріндегі бұлтартпау шарасының күшін жоюға қаулы етті.

Жәбірленуші тараптың 50 млн теңге көлеміндегі азаматтық талап-арызы қараусыз қалдырылды. Апелляциялық шағым түсіруге 15 тәулік уақыт берілді.

Сонымен қатар, төрағалық етуші судья Исмаилова прокурор мен Ақтөбе облыстық полиция департаменті бастығының назарын осы істі тергеу кезінде жол берілген қылмыстық-процестік заңнама нормаларының бұзылуына аударып, жеке қаулы шығарды.