Арықтарды бетондап тастаған : Алматыдағы жаңартылған Масанчи көшесі жаңбырдан кейін жүзіп кетті

Алматыдағы Масанчи көшесінің тұрғындары жақын арада жүргізілген реконструкциядан кейінгі нөсер кәрізі жүйесінің жай-күйіне алаңдаулы. Қала тұрғындарының айтуынша, арықтардың бір бөлігі бетондалып тасталған, соның салдарынан жаңбыр кезінде су жолдың жүру бөлігі мен жаяу жүргіншілер жолын басып қалады, деп хабарлайды Tengrinews.kz тілшісі.

"Әр жаңбыр сайын көшені су басады"

Жергілікті тұрғындардың сөзіне қарағанда, олар жұмыстар аяқталғанға дейін де қалалық қызметтердің назарын жаңбыр суын ағызу жүйесін мұқият ойластыру қажеттігіне бірнеше рет аударған.

"Біз әкімдіктен бірінші кезекте арықтар мен нөсер кәріздерін ойластыруды сұрадық, бірақ олар елемеді. Олар үшін бәрінен бұрын сыртқы сұлулық маңызды болды. Барлық арықты бетондап тастады. Енді әр жаңбыр сайын көшемізді су басатын болады", - деп атап өтті тұрғындар өз шағымында.

Instagram-дағы бұл жарияланымды көру

Tengri Almaty (@tengri.almaty) жарияланымы

Өтініш авторы урбанист Ринат Заитовпен бірге мамыр және маусым айларында учаске бастығына бірнеше рет жүгінгенін, кейін бұл мәселені "Алматы" ӘКК жиналысында көтергенін алға тартады.

"Біз тіпті Сәтбаев көшесінің бойымен қосымша арық арқылы - шығыс беттегі арықтан батыс бетке дейін су ағызуды жасауды және Масанчидің қос қапталындағы арықтарды тереңдетуді ұсындық. Бірақ ешкім құлақ аспады. Өкінішті-ақ!" - деп кейиді жергілікті тұрғындар.

Алматы әкімдігі тұрғындардың шағымына жауап беріп, аталған учаскеде аумақты санитарлық тазалау жұмыстары жүргізілгенін мәлімдеді.

Әкімдіктің нұсқасы бойынша, арық желісі тұрмыстық қоқысқа толып қалған, бұл судың қалыпты өтуіне кедергі келтірген.

"Бүгінгі таңда тазалау жұмыстары аяқталды, арық желісі штаттық режимде жұмыс істеп тұр. Аумақ тиісті санитарлық және пайдалану жағдайында", - деп мәлімдеді жергілікті атқарушы орган өкілдері.

Сонымен қатар, тұрғындар реконструкциядан кейін жаңбыр суын ағызу мәселесін бөлек шешу қажеттігін айтып, жауын кезінде су басу қаупінен әлі де қауіптенеді.

Бұған дейін Алматы тұрғындары Абай даңғылын абаттандыру кезіндегі қолайсыздықтарға шағымданған болатын. Қалалықтардың айтуынша, құрылыс қоршаулары мен шашылып жатқан материалдардың кесірінен бұл учаскемен жүру қиындық тудырып жатыр.

Бізді Google-дың негізгі дереккөздер тізіміне қосыңыз