Алматыда жаңбырдан кейін көліктер жүзіп жүр су басқан көшелердің тізімі

Желіде Алматыдағы толассыз жауған жаңбыр салдары түсірілген видеолар пайда болды, - деп хабарлайды Tengri Auto.

Желіде Алматыдағы толассыз жауған жаңбыр салдары түсірілген видеолар пайда болды, - деп хабарлайды Tengri Auto.

Кадрлардан Жәңгір хан көшесінде жолдың жүру бөлігін су басқаны байқалады.

Видеоға қарағанда, су деңгейі кей жерлерде жеңіл көліктердің фарасына дейін көтеріліп, соның салдарынан қозғалыс айтарлықтай қиындаған.

Instagram-дағы бұл жарияланымды көру

Жарияланым Рашит Ильясовтың (@rashit_ilyassov) парақшасынан алынды

Видео авторының айтуынша, бұрын бұл учаскеде сай болған, бірақ кейін аумаққа құрылыс түсіп, соның салдарынан судың табиғи ағысы бұзылған.

Оның сөзіне қарағанда, су басу мәселесі жиі туындайды. Сонымен қатар тұрғындар бұл ауданда кәріз жүйесіне қатысты қиындықтар бар екенін айтады: жеке үйлер шағын сорғы станциясына қосылған, ал ол жүктемені көтере алмайды.

Тұрғындардың айтуынша, мезгіл-мезгіл құбырлар жарылып, ағын сулар сыртқа жайылып жатады, ал орталық кәріз жүйесін салу мәселесі көтеріліп келе жатқанына бірнеше жыл болған көрінеді.

Бұл ретте ТЖД 16 сәуірде сағат 10.00-ден бастап аталған көшеде су басу салдарын жою үшін арнайы техника қойылғанын хабарлады.

Су басқан көшелер тізімі

Су басу жағдайы қаланың бірнеше ауданында байқалған. ТЖД мәліметінше, ескертуге байланысты 16 сәуірде сағат 10.00-ден бастап қауіпті учаскелерге техника мен күштер алдын ала бағытталған.

Барлығы су басу қаупі бар 7 учаске бақылауға алынған.

Алатау ауданы

Жұмыстар бірнеше учаскеде бірдей жүргізіліп жатыр:

"Көкқайнар" шағынауданы, Ақбастау көшесі - №19 мамандандырылған өрт сөндіру бөлімі жұмылдырылды (Toyota Hilux); "Ақбұлақ" шағынауданы, Қарғалы өзенінің арнасы (Оңғарсынова көшесінің ауданы) - №2 өрт сөндіру бөлімі (Toyota Hilux); "Ақбұлақ" шағынауданы, Дәулетқалиев көшесі - №17 өрт сөндіру бөлімі (АЦ-5-40 автоцистернасы); Рысқұлов даңғылы, Братская көшесінің қиылысы - №14 өрт сөндіру бөлімі (Toyota Hilux); Бес Арыс көшесі - мамандандырылған жасақ (АЦ-5-40); Домалақ Ана көшесі - №12 өрт сөндіру бөлімі (АЦ-5-40 автоцистернасы).

Суретті Алматы ТЖД баспасөз қызметі ұсынды

Алматыдағы екі күндік нөсер

Еске сала кетейік, синоптиктердің болжамына сәйкес, 16 сәуірде Алматыда күн бұлтты болады деп күтіледі. Сағат 16:00-ден кейін кей жерлерде 17 мм-ге дейін нөсер жаңбыр жауып, күн күркіреп, желдің екпіні 15–18 м/с дейін жетеді деп болжанған. Күндіз ауа температурасы +17…+19 °C болады.

17 сәуірде де жауын-шашын күтіледі: кей уақытта 12 мм-ге дейін нөсер жаңбыр жауып, күн күркірейді және жел 18 м/с дейін күшейеді. Түнде температура +8…+10 °C-қа дейін, күндіз - +11…+13 °C-қа дейін төмендейді.

Google News арқылы жаңалықтарымызды қадағалаңыз

Жазылу