Астанада бастығын естен танғанша сабаған полиция бастығының орынбасары сотталды

Астана қалалық Полиция департаменті (ПД) Есіл ауданы полиция басқармасының жергілікті полиция қызметі бастығының орынбасары Әли Әбетаев өз бастығы Сәкен Ноғаевты соққыға жыққаны үшін сотталды, деп хабарлайды Arasha.kz.

«Астана қаласының қылмыстық істер жөніндегі ауданаралық сотының 2026 жылғы 27 ақпандағы үкімімен Ә.А. Әбетаев ҚР Қылмыстық кодексінің 108-1-бабы 2-бөлігінің 1-тармағы (денсаулыққа қасақана жеңіл зиян келтіру) бойынша кінәлі деп танылып, бір жылға бас бостандығын шектеу жазасына кесілді», - делінген соттың жеке қаулысында.

Оқиға 2025 жылғы 5 шілдеде болған.

«Сағат 00:01-де С.А. Ноғаев пен Ә.А. Әбетаев "Meat&Beer" мекемесі ғимаратының артқы жағында тұрып, өзара сөйлесе бастаған. Әңгіме барысында Әбетаев Ноғаевтан неге қоңырауларына жауап бермегенін сұраған. Ноғаев телефоны бұзылып тұрғанын айтқаннан кейін, Әбетаев ашуға булығып, сағат 00:02-де Ноғаевтың бет тұсынан жұдырықпен бір рет ұрған. Соңғысы қорғанып, шетке қарай шегіне бастағанда, Әбетаев оның беті мен басынан тағы үш рет ұрған. Соққылардан есін жоғалта бастаған Ноғаев Әбетаевты ұстап алып, екеуі екі көліктің арасына құлаған. Сол жерде Әбетаев тоқтамастан Ноғаевтың басы мен бетіне тағы бірнеше соққы жұмсап, соңынан мойнынан арт жағынан қылқындыру әдісін қолданған. Әбетаевтың заңсыз әрекеттерінің салдарынан жәбірленушіге жеңіл дене жарақаты келтірілді», — деп жазылған құжатта.