Астанада дәрігерлерге түсетін әрбір бесінші шақырту шетелдіктерден

Денсаулық сақтау басқармасы алдағы 4 жылда 11 медициналық нысан салуды жоспарлап отыр. Бұл туралы басқарма басшысы Айнұр Төлеуова 2025 жылдың қорытындысы бойынша өткен алқа мәжілісінде мәлімдеді, деп хабарлайды Arasha.kz.

Оның айтуынша, бүгінде елордалық медициналық ұйымдар шамадан тыс жүктемемен жұмыс істеп жатыр және жоспарлы қуаттылығынан әлдеқайда көп халыққа қызмет көрсетуде.

«Елорда халқының саны жылына орта есеппен 100 мың адамға өсетінін ескерсек, қазіргі денсаулық сақтау инфрақұрылымына үлкен салмақ түсіп отырғанын түсінеміз. Жедел жәрдемге түсетін әрбір бесінші шақыру қалалық емханаларға тіркелмеген өзге қала тұрғындары мен шетелдік азаматтардан келеді», - деді қалалық денсаулық сақтау басқармасының басшысы.

Үкімет бекіткен елорданың Бас жоспарына сәйкес, 2035 жылға қарай халық саны 2,3 миллион тұрғынға жетеді деп болжануда.

Бұл мәселені шешу үшін бірқатар медициналық ұйымдардың құрылысы жоспарланған. Олардың ішінде:

2 перинаталдық орталық;

Жаңа заманауи көпбейінді аурухана;

6 жаңа толыққанды емхана (оның ішінде 2 мемлекеттік);

2 жедел медициналық көмек қосалқы станциясы.

Бұдан бөлек, осы жылдың мамыр айында №2 қалалық көпбейінді аурухана жанындағы қабылдау-диагностикалық кешенінің құрылысы аяқталады. Бұл жай ғана екі корпусты біріктіру емес, көпфункционалды реанимация, қарқынды терапия палаталары және тағы басқа бөлімдері бар ірі флагмандық медициналық орталық болмақ.