Астанада көктайғақтан ауруханаға түскендер қатары көбейді

Кәрі құда қыстың әлегі аз болмайтын тәрізді.

Өйткені қар мен қоса жаңбыр жауып, артынша аяз болатыны ешкімге таңсық емес. Бұл әрине көлікке де, жүргіншіге де қиын. Астаналық жолшылар қазір қардан бұрын мұзбен алысып әлек.

Ал мұндайда оқыстан жарақат алатындар көбейеді. Кейінгі күндері Астанадағы травматологиялық бөлімшелерде адам толы.

Еркебұлан Смадияров, тілші:

- Астанада ауа райы күрт құбылып тұр. Толассыз қар жауды, ақтүтек боран соқты. Тіпті қар аралас жаңбыр да жауды. Салдарынан жолдың бәрінде сірескен көк мұз пайда болды. Сондықтан барыс-келісті барынша азайтқан абзал. 

Ұлттық ғылыми травматология және ортопедия орталығында дәрігерлерге дамыл жоқ. Қыс басталғалы бері тәулігіне кемінде 100 шақты адам травматологтың көмегіне жүгінеді. Олардың жартысынан көбі көктайғақ салдарынан жарақат алған. Бірінің аяқ-қолы сынса, енді бірінің бас-миы зақымдалған.

Әділбек Жылқыбақов, Н. Батпенов атындағы Ұлттық ғылыми травматология және ортопедия орталығының меңгерушісі:

- Биыл алғашқы көктайғақ кез қараша айында болды. Күн күрт жылып, күрт салқындаған. Сол кезде тәулігіне 150 шақты адам жарақат алды. Біз демалыссыз жұмыс істедік. Қазір тәулігіне 90-100 адам келеді. Бұл да аз емес. Біз бәріне бірдей шұғыл көмек көрсетіп, бақылауымызға алып жатырмыз.

Бұл орталыққа Алматы, Байқоңыр және Нұра аудандарының тұрғындары келеді. Ал өзге аудандарда қосымша травматологиялық пунктер жұмыс істеп тұр. Яғни, көктайғақ салдарынан жарақат алғандар бұдан да көп болуы мүмкін. 

"Астана Тазалық" кәсіпорыны күшейтілген жұмыс режиміне көшті. Енді олар 4 ауысыммен еңбек етеді. Жаяу жүргіншілер жолын күтіп-ұстаудың өзіне 70 шақты техника мен 200-дей адам жұмылдырылған. 

Еркебұлан Ерғалиев, "Астана Тазалық" ЖШС учаске басшысы:

- Жоспарланған күйде жұмыс атқарылып жатыр. Яғни бірінші кезекте аялдамалар мен жаяу жүргіншілер және әлеуметтік нысандардың аумақтары, яғни мектептер, балабақшалар, ауруханаларда жұмыс атқарылады. Таңғы 06:00-ден күндізгі 15:00-ге дейін, таңғы 08:00-ден кешкі 17:00-ге дейін, 12:00-ден 20:00-ге дейін және 20:00-ден таңғы 05:00-ге дейін 4 ауысыммен жұмыстар атқарылып жатыр. 

Жолдың бәріне бұрынғыдай тұз емес, енді арнайы тұз қоспасы төгіліп жатыр. Ол мұзды тез ерітеді және адам денсулығына, жол мен көліктерге айтарлықтай зиян келтірмейді, дейді мамандар.

Қазгидрометтің болжауынша, Астанада осы апта бойы қар жауып, боран соғады. Сондықтан коммуналдық кәсіпорынның жүктемесі әзірге жеңілдей қоймайтын сыңайлы. Ал дәрігерлер тұрғындарға сақтық шараларын естен шығармауға кеңес береді. Яғни асықпай жүру, қолды қалтаға салмау және аяқ киімге арналған қорғаныш бұйымдарын қолдану керегін айтты.

Еркебұлан Смадияров, Марат Диқанбаев