Астанада қажылыққа апарамын деп 17 адамды алдаған ер адам сотталды

АСТАНА, 18 сәуір – Sputnik. Астанада бірнеше азаматты алдап, 7,4 млн теңгеден астам қаржыны иемденген ер адам сотталды, деп хабарлайды қалалық прокуратураның сайты.

Ол өзін қажылық сапарын ұйымдастырушы ретінде көрсетіп, әуе билеттерін әперуге, қонақ үйлерге орналастыруға уәде еткен.

"Еліміздің әр өңірінен 17 адам алаяқтың құрбаны болды, олардың арасында қарт ата-аналарын умраға жіберуді жоспарлаған отбасылар да бар", - деп жазылған хабарламада.

Сотталушы ірі көлемдегі алаяқтық жасағанын мойындап, жәбірленушілерге келтірілген залалды өтеді.

Сот үкімімен оған 3 жыл мерзімге бас бостандығын шектеу жазасы кесіліп, пробациялық бақылау белгіленді.

Прокуратура қажылыққа байланысты қызметтерді алу үшін лицензиясы бар туристік агенттіктерге жүгіну қажеттігін ескертті.