Астанада жаһандық инвестициялар форумы өтті

150 млрд доллар. Алдағы төрт жылда елге осыншама инвестиция тарту көзделген. Ақмола облысында астықты терең өңдеу кешені сол қаражат есебінен салынатын жобалар қатарында. Мұны іске асыру бойынша стратегиялық келісімге қол қойылды. 2030 жылға дейін жүзеге асатын бұл бастама аясында экологиялық таза энергия өндіретін жылу электр орталығы және заманауи астық өңдеу зауыты салынады. Инвесторлар мен өңір басшылары Астанада өткен жаһандық инвестициялар форумында келісім жасасты.

2029 жылға дейін Қазақстанға 150 млрд доллар инвестиция тарту көзделген. Бұл жоспар қазірдің өзінде 60%-ға орындалды. Мұны Сыртқы істер министрлігінің Инвестиция комитеті хабарлады. Жыл аяғына дейін елге 25 миллиард доллардан астам қаржы тарту жоспарланған. Қазақстанның жері Еуропа мен Азияны жалғайды. Қазақстан арқылы 1,5 млрд тұтынушысы бар Азия нарығына шығуға болады. «Бұл – еліміздің географиялық артықшылығы», - дейді сарапшылар. Шетелдік компанияларды логистикалық мүмкіндіктермен қатар түрлі жеңілдіктер де қызықтырады. 

Олжас Бектенов  ҚР Премьер-Министрі:

- Мемлекет басшысы Қасым-Жомарт Тоқаев Қазақстан халқына Жолдауында жаңа инвестициялық бастамаларды іске асыру қажеттігін баса айтты. Ел Үкіметі ұлттық экономиканы трансформациялау бағытында жүйелі жұмыс жүргізіп жатыр. Соның бірі әрі бірегейі - Транскаспий халықаралық көлік бағыты. Бұл жоба тек Қазақстан үшін ғана емес, бүкіл өңір үшін стратегиялық маңызға ие. 

Осы іспетті ірі бастамалар шетелдік капитал мен халықаралық қаржы институттарының қатысуымен іске асуда. Бұған қоса Мемлекет басшысының жасанды интеллект технологияларын енгізу жөніндегі тапсырмасын жүзеге асыруға ерекше назар аударылды. Озық шешімдерді енгізуге және стартаптарды одан әрі жеделдетуге бағытталған Alem.ai жасанды интеллект орталығының құрылуы - осы сөзімізге дәлел.

Ғабидолла Оспанқұлов, ҚР Сыртқы істер министрлігі инвестиция комитетінің төрағасы:

- Бізде салықтық және кедендік преференцияларымыз бар. Жер салығынан, корпоративтік салығынан, мүлік 8-10 жылға босатамыз. Кедендік жеңілдіктер береміз. Біз тегін жер бере аламыз, инвестиционный контракт арқылы. Осы пакетті есептесек, бұл инвесторларға өте тиімді. Келіп бізден зауыт ашса, ол жұмыс орындар құрылады және сол зауыттың айналасында шағын және орта бизнес дамиды. 

Форум аясында бірқатар келісімге қол қойылды. Мәселен, Ақмола облысында астықты терең өңдеу зауыты іске қосылады. Кәсіпорын лимон қышқылы, биоэтанол және азықтық концентраттар өндіреді. Инвестициялық жоба аясында аймақта жылу электр орталығы да салынбақ. Жобаның жалпы құны — 1,5 миллиард АҚШ доллар. Ал Абай облысында төрт инвестициялық жоба іске асыру жоспарланған. Форум аясында тиісті келісімдерге қол қойылды. 

Ербол Садыр, Абай облысы әкімінің бірінші орынбасары:

- Оның біріншісі, алтын өндіру бойынша Түркияның компаниясымен. Бұл жерде 485 млн доллар инвестиция келеді. Шетелдік инвестиция. Екінші, ірі кәсіпорнымыз Самал компаниясымен. Бұл жерде улы химиялық зауыт құрылысы. 320 млн доллар көлемінде инвестиция жоспарланып отыр. Одан кейін ауыл шаурашылығын дамыту бойынша 20 мың гектар жерге тамшылатып суару жүйесі бойынша үлкен жоба жоспарланып отыр және сонымен қатар аяқ киім тігетін фабрика ашу жөнінде жоба қарастырылу үстінде.

Сарапшылардың пайымдауынша бұл жобалар ел экономикасына мол қаржы әкеледі. Әрі жаңа жұмыс орындарының ашылуына сеп болады. Жалпы инвестициялық форум аясында құны 7 млрд доллардан асатын 50-ге жуық келісімге қол қойылды.

Авторлары: Ғазиза Мұхамеджанова, Ғалымжан Абдылахат