Астанадан шыққан сапар жолаушылардың бірі үшін қайғылы жағдаймен аяқталды

Астанадан шыққан пойыз жолаушыларының бірі үшін сапар қайғылы аяқталды. Жүрегіне ота жасатқан ер адам жұбайымен бірге келе жатып, жолда көз жұмды, деп хабарлайды Tengri Travel.

Астанадан шыққан пойыз жолаушыларының бірі үшін сапар қайғылы аяқталды. Жүрегіне ота жасатқан ер адам жұбайымен бірге келе жатып, жолда көз жұмды, деп хабарлайды Tengri Travel.

Әлеуметтік желілерде Астана мен Қостанай бағытында қатынайтын "Сары-Арқа Компани" ЖШС жеке тасымалдаушысына тиесілі пойызда жолаушы қайтыс болғаны туралы ақпарат тарады. Желі қолданушылары қайғылы жағдайға жүрек талмасы себеп болуы мүмкін деп болжады.

Компания баспасөз қызметі жолаушының қаза болу фактісін растап, оқиғаның мән-жайын айтып берді. Тасымалдаушы мәліметінше, оқиға 14 маусымда кешке "Нұрлы жол – Орал" бағытындағы №57 жолаушылар пойызында болған. Бурабай курорты бекетіне жете бергенде №19 вагондағы жолаушылар бірінің денсаулығы күрт нашарлаған.

"Кезекші жолсерік бұл туралы жолаушылар пойызы бастығына хабарлады, ол локомотив машинисі арқылы шұғыл түрде жедел жәрдем шақыртты", - деп хабарлады компания.

Тасымалдаушы ақпараты бойынша, ер адам 54 жастағы жұбайымен бірге жолға шыққан. Әйелдің айтуынша, күйеуі жүрегіне ота жасатқан клиникадан қайтып келе жатқан.

Жедел жәрдем бригадасы Бурабай курорты бекетінде сағат 23:49-да пойызға көтерілді. Дәрігерлер жолаушының қан қысымын өлшеп, көк тамырға инъекция жасаған.

Осыдан кейін ер адам есінен танып қалған. Сағат 00:30-да дәрігерлер оның өлімін тіркеді. 23 маусымда ол 56 жасқа толар еді.

Өлімнің нақты себебі айтылмады. Жолаушы жүрек талмасынан қайтыс болуы мүмкін екендігі туралы ақпарат бұған дейін әлеуметтік желілерде пайда болған еді, алайда компания бұл ақпаратты растамады.

Оқиғадан кейін марқұмның денесі сот-медициналық іс-шаралар жүргізу үшін Көкшетау бекетінде пойыздан түсірілді.

"Аталған жағдай бойынша пойыз бастығының, локомотив машинисінің, вокзал бойынша кезекшінің, ЖПБ қызметкері мен фельдшерлердің қолы қойылған акт жасалды", - деп хабарлады тасымалдаушының баспасөз қызметі.

Медициналық және тергеу амалдары жүргізілуіне байланысты пойыз 43 минутқа кешікті.

Компания оқиғаның басқа мән-жайын жарияламады. Өлімнің ресми себебі тиісті іс-шаралар қорытындысы бойынша анықталады.

Тағы оқыңыз: Қазақстанда қосымша пойыздар іске қосылады: бағыттар тізімі

Google News арқылы жаңалықтарымызды қадағалаңыз