Астанаға ұшқан ұшақта сорақы ұрлық жасалды

Қазақстанның көлік полициясы қызметкерлері сорақы қылмыстың бетін ашты. Екі шетел азаматы әуе кеңістігінде ұшақ жолаушысын тонап үлгерген.

Оқиға Шымкент — Астана бағыты бойынша рейс орындаған әуе кемесінің бортында болған.

Криминалдық полицияның мәліметінше, қаскөйлер құрбанын мұқият бақылап отырған. Ұшақ көтерілген кезде ер адамның назары басқа жаққа ауып, алаңдап кеткенін пайдаланып, оның заттарының арасынан ірі көлемдегі ақшаны — 7,6 миллион теңгені білдіртпей суырып алған.

Ұшақ қонғаннан кейін зардап шегуші ақшасының жоғалғанын байқап, дабыл қаққан. Көліктегі полиция департаментінің жедел уәкілдері барынша жылдам әрекет етті: күдіктілерді анықтап, ізін суытпай тура әуежайда ұстады.

«Осы қылмысты жасағаны үшін екі шетел азаматы анықталып, ұсталды. Олар кінәсін мойындады және соттың санкциясымен қамауға алынды», — деп хабарлады Ішкі істер министрлігінен.

Тоналған жолаушының бағына орай, шетелдіктер ұрланған миллиондарды жаратып үлгермеген. Тәртіп сақшылары ұрланған барлық ақшалай қаражатты тәркілеп, заңды иесіне толық көлемде қайтарды.

Қазіргі уақытта тергеушілер бұл жағдайдың қайталанғанын тексеріп жатыр. Ұсталған шетелдіктердің бұған дейін басқа да авиарейстерде осындай «аспандағы ұрлықпен» айналысуы мүмкін деп ойлауға негіз бар. Аса ірі көлемдегі ұрлық дерегі бойынша сотқа дейінгі тергеу амалдары жүргізіліп жатыр.

Осы оқиғаға байланысты Көліктегі полиция департаменті қазақстандықтарға саяхат кезінде сақтықты жоғалтпау, ұшақтың үстіңгі сөрелеріне қойылатын сыртқы киімдердің қалтасына ақша мен құжаттарды қалдырмау және қол жүгіне мұқият болу қажет екенін еске салды

Бүгін, 17:40