Астаналық дәрігерлер генетикалық аурудың алдын алатын жаңа әдісті тәжірибеге енгізді

Астана қаласының мамандары эмбриондарға генетикалық зерттеу жүргізудің тың тәсілін клиникалық тәжірибеге енгізді, – деп хабарлайды Aikyn.kz сайты.

Бұл инновациялық әдіс тұқым қуалайтын патологияларды ұрық дамуының бастапқы кезеңінде анықтауға мүмкіндік береді, нәтижесінде ата-аналарға дені сау сәбидің дүниеге келуіне үлкен үміт сыйлайды.

Мамандардың айтуынша, бұл зерттеу түрі бұған дейін Қазақстанда қолданылмаған. Бұрын биопсия үлгілері шетелге жіберіліп, нәтижелерін бір айға жуық уақыт күтуге тура келетін. Ал жаңа технология арқылы эмбрионның генетикалық жай-күйі небәрі бір апта ішінде анықталады.

Жаңа әдіс Даун, Эдвардс синдромдары және басқа да тұқым қуалайтын ауруларды ерте кезеңде анықтауға жол ашады. Жыл басынан бері жүргізілген зерттеулердің нәтижесінде 196 сау нәресте өмірге келген.

Бұл – отандық медицинадағы үлкен жетістік және генетикалық қауіптің алдын алудағы маңызды қадам.