Атырау облысы Қызылқоға ауданындағы ауылдарда мәдениет үйінің құрылысы бітпей тұр

Атырау облысы Қызылқоға ауданының 2 ауылында мәдениет үйінің құрылысы бітпей тұр.

Мұқырдағы нысанның іргетасы 8 жыл бұрын қаланып еді. Алайда алғашқы мердігердің салғырттығынан құрылыс созбалаңға салынып, қылмыстық іс қозғалды. Қарабау ауылындағы мәдениет үйі де уақытында тапсырылмады.

Бес мыңға тарта тұрғыны бар Қарабау ауылындағы мәдениет үйінің ескі ғимараты апатты деп танылып, былтыр жаңа нысанның құрылысы басталған болатын. Бірақ жұмыс ұзаққа созылмай, орта жолда тоқтап қалды. Жоспар бойынша мәдениет ошағы биыл тапсырылуы керек еді. Алайда мердігер құрылысты жүргізуге күн райы қолайсыз болды деп, мерзімін шегере берген.

Талғат Қадырғалиев, Қарабау ауылының тұрғыны:

- Салынғанда ауыл болып қуанып едік. Осы ауылымыздың үлкендері бар, жастары бар, орта буыны бар, концерт көре ме, тағы басқа спектакль бірдеңе бола ма деп ойлап, өзімізше басталғанда қуанып едік. Жағдайды өздеріңіз көріп тұрсыздар. Былтыр басталды. Биыл аяқталуы керек еді қыркүйекте. 

Жауаптылардың сөзінше, Қарабау мәдениет үйі келесі жылы пайдалануға беріледі. Мердігер міндетін орындайды. Ал Мұқыр ауылындағы жағдай одан да күрделі. 

Асланбек Шығыр, тілші:

- Мұқыр ауылындағы мәдениет үйінің құрылысы 2017 жылдан бері бітпей тұр. Ескі құрылыс ғимараты салу жұмыстары аяқталмай жатып, апатты деп танылды. Кейін сүрілді. Орнына осындай жаңа ғимарат бой көтерді. Бірақ мұның өзінде де қазір құрылыс жұмыстары тұралап тұр.

Ауылда 30 жылдан бері мәдениет үйі жоқ. 8 жыл бұрын басталған алғашқы құрылысқа  400 млн теңге бөлінген. Бірақ сапасыз салынған  нысан бұзылып, биыл жоба құны 1 млрд теңге болатын жаңа ғимараттың іргетесі қаланған еді. Алайда оның да құрылысы аяқталмай қалды.

Азамат Жақсиев, Мұқыр ауылдық округінің әкімі:

- Жалпы ауыл тұрғындарының бірден-бір мәдениетін қалыптастыратын мәдениет үйі, мәдениет ошағы. Ауыл тұрғындарының бірден-бір арманы деп айтуға болады. Осы мәдениет үйі тезірек бітіп, ауыл тұрғындарына, халыққа пайдалануға берілсе деген тілегіміз бар. Жалпы біздің клуб қызметкерлері мектептің акт залында отырады. Ыждағаттап, осы құрылысты аяқтап, тапсырса деген тілегіміз бар.

Мұқырдағы мәдениет үйінің алғашқы құрылысының аяқталмауы мердігер мекеменің салғырттынан болды, дейді жауаптылар. 

Дархан Тілепберген, облыстық құрылыс басқармасының бөлім басшысы:

- Мердігердің мардымсыздығынан және мердігерге байланысты қылмыстық іс қозғалуына байланысты «Автостройконсалтинг» мекемесімен келісімшарт бір жақты бұзылды. Бұл мекеме қазір банкрот деп жарияланған және де штрафтар төленді. Содан кейін 2024 жылы кері тендерлік рәсімдер жүргізіліп, «Жиенбай» ЖШС анықталды. 2025 жылға бөлінген қаржы толықтай игерілді. 2026 жылы толықтай қаржысы бөлініп, бірінші жарты жылдығында 2026 жылдың құрылыс жұмыстары толықтай аяқталады. 

Екі ғимарат та келесі жылы пайдалануға беріледі, дейді жауаптылар. Қазір өңірде 17 мәдениет нысанының құрылысы жүріп жатыр. 2025 жылы үш ғимарат ел игілігіне тапсырылды. 

Асланбек Шығыр, Амантай Мәтенов, Жандос Рахметуллин