Қызылқоға ауданындағы қайғылы оқиға: келіні қарт енесін өлтірді

82 жастағы аудан тұрғыны өз үйінде қаза тапты.

Іс материалдарына сәйкес, ұзақ уақыт бойы ауыр науқасқа шалдыққан 1942 жылы туған әйел төсекке таңылып, тұрақты күтімді қажет еткен. Өткен жылдың мамыр айында үйде қария мен 38 жастағы келіні ғана болған. Отбасының басқа мүшелері сол күні үйде болмаған.

Сол күні күдікті ас үй пышағымен қарт әйелге шабуыл жасаған. Тергеу дерегінше, басына және денесіне кемінде төрт рет соққы жасалған. Жараланған әйел аудандық ауруханаға жеткізілгенімен, дәрігерлер оның өмірін сақтап қала алмады.

Қылмыстық іс ҚР Қылмыстық кодексінің 99-бабы («Адам өлтіру») бойынша қозғалды. Күдікті ұсталып, қамауға алынды. Тергеу барысында сот-медициналық және психологиялық-психиатриялық сараптамалар тағайындалды.

Сарапшылардың қорытындысына сәйкес, әйел созылмалы психикалық ауруға — параноидты шизофренияға шалдыққан.

Қазіргі уақытта іс Атырау облысының қылмыстық істер жөніндегі мамандандырылған ауданаралық сотында қаралуда. Істі судья Зарема Хамидуллина жүргізіп отыр.

Айгүл МАНСУРОВА

Бүгін, 11:55