Атырау облысында табиғи газдан уланған үш адам көз жұмды

АСТАНА, 29 желтоқсан – Sputnik. Атырау облысында үш адам табиғи газдан уланып көз жұмды, деп хабарлайды Sputnik Қазақстан.

Облыстық ТЖД мәліметінше қайғылы оқиға 28 желтоқсан күні сағат 13:40-та Атырау қаласы Томарлы ауылындағы тұрғын үйлердің бірінде болған.

"Алдын ала болжам бойынша табиғи газбен жұмыс істейтін жылыту пешін пайдалану талаптарының бұзылуынан 3 адам табиғи газдан уланып, оқиға орнында көз жұмды", - деп жазылған хабарламада.

Полиция департаменті қызметкерлері өлімнің нақты себебін анықтау мақсатында сот-медициналық сараптама тағайындады.

Атырау облысы ТЖД азаматтарды газ қондырғыларын пайдалану кезінде қауіпсіздік талаптарын қатаң сақтауға шақырды.