​Атырау тұрғыны анасының қайтыс болу туралы куәлігін ала алмай жүр

Қала тұрғыны Жансая Әшім бірнеше аптадан бері анасының қайтыс болу туралы куәлігін ала алмай жүр. Осы құжаттың жоқтығынан отбасы қажетті құжаттарды әрі қарай заңдастыра алмай жүр.

Қайғылы оқиға қаңтарда болған. Жансаяның анасы өз үйінің есігі алдында құлап, сол жерден жан тапсырады. Ол гипертониямен ауырған. Сол жерде туыстары жедел жәрдем мен полиция шақырды.

Оқиға болған күні шұғыл қызмет мамандары өлім дерегін тіркеді, құжаттарды ресімдегенге дейін сүйекті үйде қалдырды.

«Біз бірден жедел жәрдем мен полицияға қоңырау шалдық. Қызметкерлер келіп, өлім фактісін тіркеді. Сүйекті қолхатпен үйде қалдырды», — дейді Жансая.

Қалалық полиция бөлімі бұл мәліметтерді растап, туыстарына өлім фактісін тіркеу туралы анықтама берді. Алайда отбасы әлі күнге дейін медициналық қайтыс болу туралы куәлікті ала алмады.

Жансаяның айтуынша, №3 қалалық емханада оның анасы осы медициналық мекемеде тіркелмеген деген желеумен бас тартқан. Ал қызы анасы дәрігерлердің бақылауында болғанын және созылмалы ауруы болғанын айтып отыр. 

«Біз анамыздың қайтыс болғанын дәлелдеу үшін барлық инстанцияларды аралап жүрміз», — дейді Жансая.

Полиция олардың анықтамасы тек өлім дерегін тіркейтінін және медициналық қорытынды ретінде қолданылмайтынын түсіндірді. Ресми қайтыс болу туралы куәлікті халыққа қызмет көрсету орталығы арқылы дәрігерлер беретін өлім себебі көрсетілген медициналық куәліктің негізінде рәсімдейді.

Редакция Атырау облысының денсаулық сақтау басқармасына медициналық өлім туралы куәлікті кім және қандай жағдайларда рәсімдеуге міндетті екенін түсіндіруді, сондай-ақ медициналық мекеменің әрекетіне баға беруді сұрап, ресми сауал жолдады.

Айгүл МАНСУРОВА

Бүгін, 09:24