Атырауда автобус жүргізушілері уәде етілген 530 мың теңгеден төмен жалақыға шағымданды

Жүргізушілердің сөзінше, екі жылға жуық уақыт ішінде ешқайсысы бекітілген соманы толық көлемде алмаған.

Бұдан басқа, олар жыл басынан бері әлеуметтік төлемдер – зейнетақы жарналары мен міндетті медициналық сақтандыруға аударымдар жасалмай отырғанын жеткізді.

Жүргізушілердің видеоүндеуі әлеуметтік желілерде тарады. Олардың айтуынша, 2024 жылы қалалық мәслихат автопарк қызметкерлерінің жалақысын 530 мың теңге деңгейінде бекіткен, алайда іс жүзінде бұл ақша толық төленбей отыр.

Бағаның өсуі мен өмір сүру құнының қымбаттауына байланысты еңбекақы мәселесі ерекше өткір болып отыр. Егер мәселе шешілмесе, жүргізушілер жоғары органдарға, тіпті президентке дейін шағымдануға дайын екенін мәлімдеді.

Атырау әкімдігі жағдайға түсініктеме берді. Олар 2024 жылдан бастап қоғамдық көлік жүргізушілерінің жалақысы кезең-кезеңімен көтеріліп жатқанын, ал төлемдер жолаушылар тасымалына берілетін субсидия есебінен жүргізілетінін айтты.

Қала әкімдігінің мәліметінше, Атырауда жеті автопарк жолаушылар тасымалымен айналысады, ал әлеуметтік желілерде талқыланып жатқан жағдай «Atyrau-Avtopark» және «Algabus» компанияларына қатысты.

Әкімдік жалақы мәселесі автопарктердің ішкі есеп-қисабына байланысты болуы мүмкін деді. Сондай-ақ, жағдайды тексеру үшін материалдар бақылаушы органдарға жіберілуі мүмкін екенін жеткізді. Сонымен бірге, жалақының толық әрі уақытылы төленуін қамтамасыз ету үшін автопарк иелерімен кездесулер өткізілмек.

Автопарктердің бірі жүргізушілермен кездесіп, қалыптасқан жағдай бойынша түсініктеме берген.

Анастасия ШЕРСТЯНКИНА

Бүгін, 10:55