​​Атырауда коммуналдық қызмет тарифі тағы да көтерілуі мүмкін

1 қазаннан бастап Атырау тұрғындары үшін жылу мен электр энергиясының жаңа тарифтері енгізілуі мүмкін. Жылу компаниясы өз қызметінің бағасын 31%-ға, ал энергетиктер шамамен 30%-ға көтеруді сұрап отыр. Биыл екі компанияның тарифтері бұған дейін де өскен болатын.

«Атырау жылу жүйелері» ЖШС табиғи монополияларды реттеу комитетінің департаментіне жылу энергиясын жеткізу және бөлу тарифін 31%-ға арттыру туралы өтініш берген.

Компания тарифті қайта қарау қажеттілігін электр энергиясының қымбаттауымен, Атырау облысындағы орташа жалақының өсуімен және «Энергетика мен коммуналдық секторды жаңғырту» ұлттық жобасы аясындағы шығындармен түсіндіреді.

Дегенмен, сұралған 31% міндетті түрде тұтынушылардың төлемі дәл сонша өседі дегенді білдірмейді. Әр түрлі тұтынушы санаттары үшін нақты тариф мөлшерін табиғи монополияларды реттеу комитетінің департаменті кәсіпорын ұсынған материалдарды қарап, талдағаннан кейін бекітеді.

«АЖ» редакциясы «Атырау жылу жүйелері» ЖШС директоры Әлібек Темірғалиевқа қала тұрғындарын ерекше қызықтыратын сұрақтар жолдаған еді.

Атап айтқанда:

Соңғы үш жылда компания қандай таза пайда тапты? Тариф көтерілгеннен кейін қандай пайда күтіледі?

Бүгінде Атыраудағы жылу желілерінің нақты тозу деңгейі қандай? Егер тарифтер бұған дейін желіні жаңғырту үшін көтерілген болса, неге ескі желілер мәселесі әлі шешілмей отыр?

«Атырау жылу жүйелері» ЖШС-нің түпкі бенефициарлық иесі кім?

Меншік иесі тұрғындар үшін тарифті әрі қарай көтермей, пайдасының бір бөлігін желілерді жаңғыртуға бағыттауға дайын ба?

Компания басшылығының жалақысы қанша және тариф көтерілгеннен кейін ол өзгере ме?

Компания жыл сайын әкімшілік аппаратты, басшылықты, қызметтік көлікті және басқа өндірістік емес шығындарды ұстауға қанша қаржы жұмсайды? Соңғы 5 жылдағы әр жылға нақты соманы көрсетіңіз.

Егер тарифті көтеру тек желілерді жаңғырту үшін қажет болса, оның артынан тағы бір-екі жылдан кейін дәл осы себеппен халыққа қосымша жүктеме салынбайтынына кепілдік бере аласыз ба?

Қала тұрғыны тариф көтерілгеннен кейін нақты қандай нәтиже көреді? Келесі жылыту маусымында ол үшін не өзгереді?

Егер тариф ертең көтерілмесе, компанияда нақты қандай жағдай орын алады? Шынымен-ақ тарифсіз сенімді жылумен қамтамасыз ету мүмкін емес екенін растайтын құжат ұсына аласыз ба?

Олардан кейін «Атырау Жарық» ЖШС де тарифті қайта қарауға өтініш берді. Энергетиктер негізгі себеп ретінде тысқары ұйымдардың қызмет құнының өсуін, электр энергиясын жеткізу көлемінің өзгеруін және оның өзіндік құнының артуын алға тартып отыр.

1 қазаннан бастап Атырауда электр энергиясының тарифі 29,8%-ға қымбаттауы мүмкін. Жылу тарифіндегі жағдай сияқты, соңғы шешімді табиғи монополияларды реттеу комитеті қабылдайды.

Бұл жаңалық қала тұрғындарының наразылығы күшейіп тұрған кезде жарияланды. Соңғы екі ай бойы адамдар шілде мен тамыздағы өте көп сомамен келген түбіртектерді талқылап, электр жарығының жиі өшетініне шағымдануда. Әлеуметтік желі қолданушыларының бірі: «Жақында бұл квитанциялар жай ғана баланың ойыны болып көрінеді» деп жазған еді.

Бір қызығы, осы жылы «Атырау жылу жүйелері» мен «Атырау Жарық» тарифтерді бір рет көтерген еді. Себеп ретінде ҚҚС мөлшерлемесінің 12%-дан 16%-ға өсуі және облыстағы орташа жалақының статистика бойынша айтарлықтай көтерілуі көрсетілген. Соған қарағанда, Атырау облысы тұрғындарының орташа жалақысы тез өсіп жатқандай көрінеді.

Енді коммуналдық кәсіпорындар тағы да тарифті қымбаттатуды сұрап отыр. Осыған байланысты тұрғындарда: «егер тарифтер «желіні жаңғырту үшін» көтерілсе, неге әлі күнге дейін ескі желілер мен электр жарығының іркілісі міселесі шешілмей отыр? Және бұл мәселені шешу үшін тұтынушылардан тағы қанша рет қосымша төлем талап етіледі?» деген орынды сұрақ туындап отыр.

Лев ГУЗИКОВ

Фотоиллюстрация ЖИ арқылы жасалған

Кеше, 13:07