Атырауда медицина саласының үздіктері марапатталды

Атырауда Медицина қызметкерлері күніне арналған салтанатты жиын өтті. 

Махамбет атындағы академиялық қазақ драма театрында ұйымдастырылған шарада облыс әкімі Серік Шәпкенов медицина мамандарын кәсіби мерекемен құттықтап, өңірдегі денсаулық сақтау саласының жетістіктеріне тоқталды. Оның айтуынша, соңғы жылдары жаңа ауруханалар мен емханалар салынып, заманауи құралдармен жабдықталып, жоғары технологиялы қызметтердің ауқымы кеңейген. Әкім медицина қызметкерлеріне алғыс айтып, денсаулық пен табыс тіледі.

Алдағы уақытта Атырауда жаңа балалар ауруханасы мен көпсалалы медициналық орталықтар бой көтермек. Биыл кәсіби мереке қарсаңында 21 маманға қызметтік пәтер кілті табысталды. Кадр тапшылығын азайтуға бағытталған бағдарламалар нәтижесінде соңғы екі жылда маман жетіспеушілігі екі есеге қысқарған. Ауылдық жерлерге барған дәрігерлерге 10 миллион теңгеге дейін көтерме жәрдемақы берілген.

Өңірде оңалту қызметін дамытуға да көңіл бөлінуде. Жақында мүмкіндігі шектеулі азаматтарға арналған «Алмалы» оңалту орталығы ашылып, жылына 2 300 адамға дейін кешенді көмек көрсетілмек. Ана мен бала денсаулығын қорғау бағытында соңғы үш жылда ана өлімі көрсеткіші 14 пайызға төмендеген.

Салтанатты жиында сала ардагерлері мен үздік мамандарға мемлекеттік және ведомстволық марапаттар тапсырылды. «Еңбек ардагері» медалі мен «Денсаулық сақтау ісінің үздігі» төсбелгілері, «Құрмет» грамоталары және облыс әкімінің Алғыс хаттары табысталды. Марапатталғандар қатарында тәжірибелі дәрігерлер, мейіргерлер және медициналық ұйым қызметкерлері бар. Іс-шара қазақстандық эстрада жұлдыздарының қатысуымен өткен концертке ұласты.

Кеше, 20:48