​Атырауда мұнай газ саласы бойынша коммуникациялар форумы​ өтеді

Алғашқы «Energy Region Talks» өңірлік коммуникациялар форумы 15 мамырда өтеді. 

Форумды Қазақстан Энергетика министрлігінің, Атырау облысы әкімдігінің және PetroCouncil салалық кеңесінің қолдауымен тәуелсіз «Мағыналы бизнес» орталығы ұйымдастырып отыр.

Ұйымдастырушылардың мәлімдеуінше, бұл алаңда мемлекеттік орган өкілдері, мұнай-газ компаниялары, сарапшылар, өңірлік БАҚ пен қоғам белсенділері бас қосады. Қатысушылар қатарында Мәдениет және ақпарат министрлігінің, Энергетика министрлігінің, Атырау және Маңғыстау облысы әкімдіктерінің, сондай-ақ ұлттық компаниялар мен салалық операторлардың өкілдері бар.

Форум мұнай-газ секторындағы бизнес, мемлекет және қоғам арасындағы өзара қарым-қатынас мәселелеріне арналған. 

Сондай-ақ сенім мәселесіне, жобалардың қабылдануына және өңірдің дамуына қатысты коммуникацияның атқаратын рөліне ерекше назар аудару жоспарланып отыр.

Форумға дайындық аясында ұйымдастырушылар Атырау және Маңғыстау облысы тұрғындары арасында сауалнама өткізіп жатыр. Сауалнама мұнай-газ саласына деген көзқарасқа, компанияларға деген сенім деңгейіне, сондай-ақ әлеуметтік және экологиялық бастамалардан күтетін нәтижелерге қатысты. Зерттеу қорытындысы форум аясында талқылау жоспарға енгізілген.  

Форумға қатысу үшін ұйымдастырушылардың сайтында тіркелуге болады. Сауалнама 1 мамырға дейін және ұйымдастырушылардың мәліметінше, анонимді түрде жүргізіледі.

Бүгін, 16:55