Атырауда сот​ NCOC компаниясының менеджерін өлтіру ісі бойынша үкімді жеңілдеткен жоқ

Атырау облыстық соты Бибігүл Шпанованы өлтіргені үшін өмір бойына бас бостандығынан айырылған қала тұрғынының апелляциялық шағымын қарады.

Еске сала кетсек, бұл резонансты қылмыс өткен жылдың көктемінде болған. «Французский квартал» тұрғын үй кешенінде ұсақ жөндеу жұмыстарын атқарған Жетпісов сол жерде тұрған Бибігүл Шпанованың сеніміне кірген. 

Ол әйелге жеңілдікпен автотұрақ орнын сатып алуға көмектесемін деп уәде беріп, алдын ала 400 мың теңге алған. Арада бір жыл өткен соң, уәдесін орындамағаны туралы еске салған кезде, Жетпісов мас күйінде Шпанованың үйіне барып, оған бірнеше рет пышақ жарақатын салған, зорлаған, ақшасы мен әшекей бұйымдарын ұрлап, автокөлігін айдап кеткен. Кейін ол Маңғыстау облысының аумағында ұсталды. Ал қаза тапқан әйел жүкті болған еді...

Қылмыстың мән-жайын ескере отырып, қылмыстық іс жабық режимде қаралды. Қыркүйек айында сот А. Жетпісовті алаяқтық, зорлау, ұрлық, автокөлікті айдап кету және әйелдің осал жағдайын пайдаланып, ерекше қатыгездікпен жасалған кісі өлтіру қылмыстары бойынша кінәлі деп таныды. Оған өмір бойына бас бостандығынан айыру жазасын тағайындады. Сонымен қатар, марқұмның туыстарының пайдасына материалдық және моральдық өтемақы өндірілді.

«Ақ Жайық» редакциясына марқұмның жақындарының мүддесін қорғаған адвокат Нұрлан Жолболов хабарлағандай, бүгін Атырау облыстық сотының қылмыстық істер жөніндегі сот алқасы Жетпісовтің апелляциялық шағымын қарап, оны қанағаттандырусыз қалдырды.

Осылайша, өмір бойына бас бостандығынан айыру жазасы заңды күшіне енді.

Лев ГУЗИКОВ

Бүгін, 17:08