Атыраудағы алаң, видеочеллендж жүйесі, федерацияға төленетін жарналар: қазақстандық волейбол клубтары федерацияға қатаң талап қойды

Сурет: instagram/volleyfederationkz

Қазақстан ұлттық волейбол лигасының алты жетекші ерлер клубы Қазақстан волейбол федерациясының (ҚВФ) президенті Мәди Такиевтің атына ресми хат жолдады.

Командалар чемпионаттың ұйымдастырылу сапасына және федерация вице-президенті Арман Кабесовтың жұмысына алаңдаушылық білдірген.

Хат алдымен федерацияның электронды поштасына жіберілгенімен, авторлар ол адресатқа жетпей қалуы мүмкін деп болжаған. Сол себепті құжат спорт журналисті Иван Резванцевтің Telegram-арнасында да жарияланды.

Турнирлерді ұйымдастырудағы кемшіліктер

Клубтардың басты шағымы — турнирлерді өткізудің талапқа сай болмауын атап өтті. Мысал ретінде Атырауда өткен екінші «шағын тур» келтірілген. Онда ойын алаңы Ұлттық лига регламентінің негізгі талаптарына мүлде сәйкес болмаған.

Хатта көрсетілген міндетті параметрлер:

төбе биіктігі — кемінде 12,5 м;

ойын аймағының өлшемі — 31×19 м;

көрермен орындарының сыйымдылығы — кемінде 700;

еден жабындысы — Taraflex немесе Mondoflex (немесе сапалы сырғымайтын паркет);

жарық деңгейі — 1200 люкстен төмен болмауы тиіс;

желдету жүйесі — міндетті.

Авторлардың айтуынша, Атырауда бұл талаптардың ешқайсысы орындалмаған. Ылғалдылық салдарынан еденде конденсат түзіліп, ойыншыларға жарақат алу қаупін тудырған.

Төрешілер жұмысы мен видеочеллендждің жоқтығы

Тағы бір өзекті мәселе — үздік командалардың қатысуымен өткен ойындардағы төрешілік сапасы. Клубтар хатта көптеген даулы шешімдерге назар аударып, оларды қайта қарауға мүмкіндік болмағанын атап өтті. Себебі Орал, Тараз, Атырау және Талдықорған қалаларындағы «кіші турларда» видеочеллендж жүйесі қолданылмаған.

Авторлардың айтуынша, Ақтөбеде ескірген видеочеллендж жүйесі қолданылған. Техникалық жабдықтың жеткіліксіздігінен ол кейде бес ойынға дейінгі эпизодты дұрыс көрсетпеген. Сонымен қатар хатта төрешілердің видеочелленджсіз жұмыс істеуге дағдыланбағаны айтылып, бұл жағдайды одан әрі қиындатқаны көрсетілген

Қаржылық мәселелер

Клубтардың басты алаңдаушылығы — жарналардың жұмсалуы. 2025 жылдың көктемінде Қазақстан волейбол федерациясының атқару комитеті әр команда үшін жарнаны 16,5 млн теңгеге дейін көбейту туралы шешім қабылдады.  Осылайша, сегіз клуб жалпы 132 млн теңге (шамамен 254,4 мың АҚШ доллары) төлеуі тиіс болған.

Бұл қаражат:

«Қазспорт» телеарнасының жарыстарды көрсетуге арналған іссапар шығындарына; жаңа бейнеқайталау жүйесін сатып алуға; төрешілердің сыйақысын көбейтуге жоспарланған.

Алайда клуб өкілдерінің айтуынша, аталған міндеттердің ешқайсысы әлі орындалмаған. 

Соңында хат авторлары 2025 жылдың 1 қазанынан 30 қарашасына дейінгі кезеңде жиналған жарналардың толық есебін талап етті.

Есепте жалпы жиналған қаражат көлемі, шығындардың баптар бойынша бөлінуі және қаржының нақты жұмсалғанын растайтын құжаттар көрсетілуі тиіс.

Осылайша, қазақстандық волейбол клубтары федерация жұмысының ашық болуын талап етіп, өз шағымдарының жедел қаралуына үміт артып отыр.

Бүгін, 18:14