​Атыраудағы қайтарымсыз гранттар: әлеуметтік жобаға қаржыны қалай алуға болады?

Атырауда әлеуметтік кәсіпкерлерге және “Бір ауыл – бір өнім” жобасының финалистеріне қайтарымсыз грантқа өтінім беру басталды,- деп хабарлайды Өңірлік коммуникациялар қызметі.

Өтінішті беру жолы 

Өтініш 10-14 қараша аралығында қабылданады.

Облыстық Кәсіпкерлік және өнеркәсіп басқармасының бөлім басшысы Перизат Таңатованың айтуынша, Мемлекеттік қайтарымсыз грантқа өтінімдер “Kezekte.kz” сайтында қабылданады. 

"Кәсіпкерлер өтінішпен қатар құжаттар топтамасын да тапсыруы қажет. Өтінім беру және оны қарау мәселесі онлайн түрде жүзеге асырылады", - деп атап өтті П.Таңатова. 

Өткен жылдың нәтижесі

2024 жылы осы қолдаудың арқасында құны 106 млн теңгені құрайтын 16 кәсіпкерлік субъектісі қолдау тапқан. 

Солардың бірі – “Тәтті Мед” медициналық кабинетінің басшысы, кәсіпкер Тәттігүл Әбілова. Ол мемлекеттен 5 миллион теңге көлемінде қайтарымсыз грант алып, балаларға арналған фототерапиялық құрылғы сатып алған.

– Грант арқылы балалардағы сары ауруды емдеуге арналған 5 фотолампа алдым. Бүгінге дейін 500-ге жуық бала ем қабылдады. Бұл жоба арқылы балаларды емдеп қана қоймай, аналарды қолдауға мүмкіндік алып отырмын,- деді Т.Әбілова.

Айта кетейік, қазіргі уақытта өңірде әлеуметтік субъектілер тізіміне енген 72 кәсіпкер бар.

Бұл бастама әлеуметтік бизнесті дамытуға, өзін-өзі жұмыспен қамтыған азаматтарды қолдауға және қоғамдық маңызы бар жобаларды енгізуге бағытталған.

Бүгін, 11:54