Атырауды ірі өрттің салдарынан түтін мен күйік иісі басты

Атырау облысында қамыс өртеніп, қаланы күйік иісі басты, деп хабарлайды Tengrinews.kz тілшісі "Ақ Жайық" басылымына сілтеме жасап.

Басылым ақпаратынша, дүйсенбі күні кешке облыс орталығының түрлі аудандарында түтін мен күйік иісі анық сезілген.

Атырау облыстық ТЖД мәліметінше, өрт Еркінқала ауылынан Каспий теңізінің жағалауына қарай шамамен 40 шақырым жердегі баруы қиын батпақты жерде шыққан.

Сағат 20:00-дегі жағдай бойынша өрттің ауданы 34 гектарды құраған. Оның ішінде 18 гектардағы өрт сөндірушілердің күшімен жойылса, тағы төрт гектарда жану өздігінен тоқтаған.

Жағдай Атырау облысының әкімі Серік Шәпкеновтің төрағалығымен өткен шұғыл кеңесте қаралды, іс-шараға қатысушылар өртті сөндіру бойынша қабылданып жатқан шараларды талқылады, деп жазады басылым. Оған ТЖД өкілдері, Исатай және Махамбет аудандарының басшылығы, сондай-ақ жауапты қызметтердің басшылары қатысты.

Әкімдіктің баспасөз қызметінің ақпараты бойынша, қамыс өрті Исатай және Махамбет аудандарының шекарасында, Каспий теңізіне жақын жерде шыққан. Бұл ретте өрт "Ақжайық" мемлекеттік табиғи резерватының аумағынан тыс жерде болған.

Өңір басшысы ТЖД бөлімшелеріне қажетті қолдау көрсетуді және өртті сөндіруге қосымша техника бөлуді тапсырды. Сонымен қатар, ол жұмыстың тәулік бойы режимін қамтамасыз ету, екі ауданның қосымша күштері мен құралдарын жұмылдыру, "Ақжайық" резерватының күштерін тарту және барлық жұмылдырылған қызметтердің үйлестірілуін жолға қою қажеттігін атап өтті. Оқиға орнында жедел штаб жұмысын ұйымдастыру тапсырылған.