Ауруханаға түскен пациенттердің туыстарын хабардар етудің бірыңғай арнасы құрылады

– Пациенттердің жақын туыстарына ауруханаға жатқызу мәртебесі туралы уақтылы және дұрыс хабар беру – денсаулық сақтау жүйесінің ашықтығын арттырудың, жанжал жағдайларын азайтудың және азаматтардың медициналық көмекке деген сенімін қамтамасыз етудің маңызды элементі. Бүгінде медициналық ақпараттық жүйелерде пациенттер мен олардың заңды өкілдерін көрсетілетін медициналық қызметтер, аруханаға жатқызу фактілері, тағайындалған тексерулер мен рәсімдер туралы хабардар етудің жекелеген элементтері іске асыруда. Атап айтқанда, «Damumed» мобильді қосымшасында емдеуші дәрігердің бастамасы бойынша жансақтау бөлімінде жатқан пациенттің туыстарына оның денсаулық жағдайы туралы хабарлама жіберу функциясы енгізілген, - деді Үкімет басшысы.

Оның айтуынша, Денсаулық сақтау министрлігі медициналық ақпараттық жүйелерді әзірлеушілермен және мүдделі мемлекеттік органдармен бірлесіп, пациенттердің туыстарын хабардар етудің орталықтандырылған сервисін енгізу бойынша пилоттық жобаны іске асыру мәселесін қарастырып жатыр.

Аталған жоба:

– пациенттердің туыстарын аруханаға жатқызу мәртебесі (бөлімшеде, реанимацияда, отада болуы, басқа бөлімшеге ауыстырылуы және т.б.) туралы хабардар етудің бірыңғай арнасын құруды;

– мемлекеттік ақпараттық жүйелер мен цифрлық сәйкестендіру құралдарын пайдалана отырып, өтініш берушіні сәйкестендіру және оның өкілеттіктерін растау тетіктерін қамтамасыз етуді;

– сервисті медициналық ақпараттық жүйелермен біріктіру, өтініштерді тіркеу және ақпаратқа қолжетімділікті шектеуді;

– медициналық ұйымдардың пациенттердің туыстарымен байланыс жасауына арналған бірыңғай регламенттер мен стандарттарды әзірлеуді көздейді.

– Пилоттық жобаны жекелеген өңірдің медициналық ұйымдары базасында (Астана қаласы мен Алматы облысының әкімдіктері пилоттық жобаға қатысуға дайын екендігін білдірді) іске асыру жоспарланып отыр. Кейін нәтижелері бағаланып, республика деңгейінде кеңінен енгізілетін болады. Пациенттердің туыстарын хабардар етудің жүйелі және технологиялық тұрғыдан қамтамасыз етілген тетігін енгізу медицина қызметкерлеріне түсетін жүктемені азайтуға, жанжал жағдайларын барынша төмендетуге, сондай-ақ дәрігерлік құпия мен жеке деректерді қорғау саласындағы заңнама талаптарының сақталуын қамтамасыз етуге мүмкіндік береді, - деді Олжас Бектенов.

Бұған дейін Qalqan платформасы арқылы медициналық қызмет сапасы мен қаржыландыру барысы толық бақылауға алынатынын жазған едік.