AZAL ұшағы апатын тергеудің техникалық қорытындысы жақында жарияланады Бозымбаев

AZAL ұшағының апатқа ұшырауына қатысты тергеудің техникалық қорытындысы алдағы айларда ұсынылады. Бұл туралы Қазақстан Премьер-министрінің орынбасары Қанат Бозымбаев мәлімдеді, деп хабарлайды Arasha.kz.

«Халықаралық агенттік стандарттарына сәйкес, алдағы бірнеше айда Қазақстан қорытынды шығаруы тиіс. Бұл AZAL әуе апатының техникалық бөлігіне қатысты. Көлік министрлігі комиссиясының техникалық қорытындысында ұшақтың қашан атып түсірілгені (немесе зақымдалғаны), неліктен құлағаны және ненің зардап шеккені көрсетіледі. Осының бәрі регламентке сәйкес сипатталып, ресми баяндама түрінде ұсынылады», - деді Бозымбаев жұма күні үкімет кулуарында.

Премьер-министр орынбасарының айтуынша, GPS-трекерлер, навигациялық жабдықтар және әуе кемесін шығарушылардан барлық қажетті сараптамалар алынды.

«Қазір қорытындылар шығарылып жатыр, олар арнайы комиссия мүшелерімен келісілуі керек. Комиссия құрамына Әзербайжан, Қазақстан, Ресей сарапшылары, Embraer компаниясының және халықаралық агенттіктің өкілдері кіреді», - деп нақтылады ол.

Естеріңізге сала кетейік, 2024 жылдың 25 желтоқсанында Ақтау әуежайына жақын маңда Azerbaijan Airlines авиакомпаниясының Баку - Грозный бағытындағы жолаушылар ұшағы апатқа ұшыраған болатын.