Әзербайжан армиясы НАТО стандарттарына көшіріле бастады

Әзербайжан армиясы НАТО стандарттарына сәйкестендірілуде. Бұл туралы ел президенті Ильхам Әлиев альянс өкілдерімен өткен кездесуде айтты. Оның сөзінше, бұл бағытта Әзербайжан Түркиямен тығыз ынтымақтастық орнатқан, деп хабарлайды Arasha.kz.

«Ильхам Әлиев Әзербайжан армиясы НАТО стандарттарына сәйкестендіріліп жатқанын және осы тұрғыда түрік армиясымен тығыз байланыста екенін атап өтті», – делінген 6 қарашада өткен кездесудің қорытындысы жөніндегі хабарламада.

Кездесуге НАТО жанындағы Түркия, Грекия, Венгрия, Черногория, Нидерланд, Солтүстік Македония, Норвегия, Словакия, Словения, Швеция, Чехия, Португалия және Испанияның тұрақты өкілдері, сондай-ақ АҚШ пен Францияның өкілдерінің орынбасарлары қатысты.

Әлиевтің айтуынша, Әзербайжан тәуелсіздік алғаннан бергі басты мақсаты – «оккупациядан жерлерді азат ету» орындалды. Енді ел армиясын жаңғырту процесі жалғасатынын айтты. Президент сондай-ақ Әзербайжан мен НАТО арасындағы қарым-қатынастың кеңейіп келе жатқанын атап өтті. Кездесу барысында әскери сала ғана емес, аймақтық даму және энергетикалық қауіпсіздік мәселелері де талқыланды.

Әзербайжан мен НАТО арасындағы қарым-қатынас 1992 жылдың наурызында басталды. Сол кезде Әзербайжан Солтүстік Атлантикалық ынтымақтастық кеңесіне мүше болды – бұл форум НАТО мен альянсқа кірмейтін еуропалық және азиялық елдер арасындағы қатынастарды дамыту үшін құрылған. 1997 жылы кеңес Еуроатлантикалық әріптестік кеңесіне айналды.

1994 жылдың мамырында Әзербайжан бұрынғы КСРО мен Шығыс Еуропа елдеріне бағытталған «Бейбітшілік үшін әріптестік» бағдарламасына қосылды. Ал 2004 жылы президент Ильхам Әлиев НАТО басшылығына Әзербайжанның алғашқы Жеке әріптестік іс-қимыл жоспарын (IPAP) ұсынды, онда әскери-техникалық ынтымақтастықтың егжей-тегжейі көрсетілген.

2002–2021 жылдар аралығында әзербайжандық бітімгерлер НАТО-ның Ауғанстандағы «Шешуші қолдау» операциясына қатысты. 2025 жылдың маусымында Әзербайжан мен альянс әскери операцияларды жоспарлау бойынша бірлескен оқу-жаттығу өткізді, ал шілде–тамыз айларында Әзербайжан армиясы Грузия аумағында өткен НАТО-ның Agile Spirit оқу-жаттығуларына қатысқан.