БАӘ мен Бахрейнге жасалған шабуыл өртке және кәсіпорын жұмысының тоқтауына себеп болды

Абу-Дабидегі Borouge мұнай-химия зауытында әуе шабуылына тойтарыс бергеннен кейін өрт болды. Әмірлік үкіметінің медиа-кеңсесінде хабарланғандай, құлатылған нысандардың қирандылары кәсіпорын аумағындағы бірнеше жерде өрт тудырды. Кешеннің жұмысы дереу тоқтатылып, шығынды есептеу жұмыстары басталды.

Авариялық-құтқару қызметтері өртті тез арада жоюға кірісті. Алдын ала мәлімет бойынша, қаза тапқандар мен зардап шеккендер жоқ. Билік жұртшылықты жағдайдың ары қарай қалай өрбитіні жайлы хабардар етуге уәде берді.

Сонымен қатар Бахрейндегі Gulf Petrochemical Industries Co. (BSC) мұнай-химия компаниясы нысандарына дрон шабуылы жасалғаны белгілі болды. Соққы бірнеше нысанда өрт тудырды. Өрт уақытында сөндірілді. Компания жағдайдың бақылауда екенін және ешкімнің қаза таппағанын атап өтті.

Бахрейннің Ішкі істер министрлігі де шабуылдан кейін нысандарының бірінде өрт болғанын растады. Орналасқан жері ресми түрде анықталған жоқ. Бірақ әлеуметтік желілерде таралған кадрларда мемлекеттік BAPCO компаниясына тиесілі мұнай нысанына соққы жасалғаны көрсетілген.

Иран тарапының мәлімдеуінше, шабуылдар Иран аумағындағы инфрақұрылымға жасалған шабуылдарға жауап болды, деп хабарлайды IRNA агенттігі.

Ислам революциясының қамқоршылар корпусының (КСИР) баспасөз қызметі хабарлағандай, Израиль мен АҚШ Караджадағы B1 көпіріне және Махшехрдағы мұнай-химия кәсіпорындарына шабуыл жасағаннан кейін Иран кек алу операциясын жасады. Әскери теңіз күштері мен КСИР аэроғарыштық күштерінің бірлескен әрекеті нәтижесінде мынадай жағдай болды:

1.Хайфадағы мұнай өңдеу зауытына шабуыл жасалды, негізгі нысандар қирады.

2.Хабшандағы (БАӘ) Exxon, Mobil және Chevron газ нысандарына шабуыл жасалды.

3.Ар-Рувейстегі (БАӘ) отын мен әскери материалдар өндіретін мұнай-химия кешеніне зымыран соққысы жасалды, нәтижесінде үлкен өрт болды.

4.Ситрадағы (Бахрейн) мұнай-химия нысанына ірі дрон шабуылы жасалды. Нәтижесінде өрт шықты және негізгі компоненттер жойылды.

5.Кувейттегі Аш-Шуайба мұнай-химия нысанына жасалған соққы ірі өртке және зауыттың толық жабылуына әкелді.

Зардап шеккен барлық елде шығынды есептеу жұмыстары жалғасып жатыр.

Айта кетейік, БАӘ Иран азаматтарының кіруіне және транзитіне тыйым салды.