Бағбан Атырау түбінде алматылық апортты қайта жаңғыртуда

Атырау іргесіндегі Сарыөзек ауылының тұрғыны Мұрат Халықов Алматы апортын өсіріп отыр. Топырақтың сортаңдығы мен климаттың құрғақтығына қарамастан, бес гектарлық бауда әйгілі сорттың үш түрі піседі, деп хабарлайды Tengrinews.kz 24.kz-ке сілтеме жасап.

Мұнда алғашқы бау-бақша 1958 жылы салынған. Мұрат Халықовтың ата-анасы 30 жылға жуық уақыт бойы баптап келген, ал ол бала күнінен олардың тәжірибесін үйренген. 90-жылдары ағаштар отынға кесіліп, бау-бақша жойылып кеткен еді.

Арада жылдар өткен соң бағбан ата кәсібін қайта жаңғыртуды ұйғарып, алма ағаштарын, оның ішінде Алматы апортының үш түрін қайта отырғызды. Бүгінде ағаштар қайтадан өнім бере бастаған.

"Бізде алманың жеті сорты өседі. Алматы апортының ерте, орта және кеш пісетін түрлері, сондай-ақ "Семеренко", "Ранет" және "Бурхард" сорттары бар. Егер ауа райы қолайлы болса, күзге қарай 4-5 тоннаға жуық өнім жинаймыз деп жоспарлап отырмыз", - дейді Мұрат Халықов.

Қазір бағбан балаларымен және немерелерімен бірге еңбек етіп жатыр. Жазда отбасы алманың ерте пісетін сорттарын, ал күзде кеш пісетін түрлерін жинайды. Өнім тікелей бау-бақшаның өзінде сатылады. Иелерінің айтуынша, сатып алушылар саны жыл санап артып келеді, ал сауда маусымы қараша айына дейін жалғасады.

"Алмалар пісе бастағаннан-ақ бірден сатылымға шығарамыз. Кейін басқа сорттар жетіледі, осылайша қараша айына дейін жұмыс істейміз. Сатып алушылар әрдайым көп. Кейде сұраныстың жоғары болғаны сонша, өнімді жинап үлгермей жатамыз", - дейді бағбанның қызы Айнұр Мұратова.

Бүгінде бауда тек алма ағаштары ғана емес, алмұрттың төрт сорты да алғашқы өнімін бере бастаған. Мұрат Халықов шаруашылығын әрі қарай дамытуды көздеп отыр. Ол тамшылатып суару жүйесін орнатуды, ал болашақта өнімді қайта өңдеуді қолға алып, өз жемістерінен табиғи өнім шығаруды жоспарлап отыр.

Google News арқылы жаңалықтарымызды қадағалаңыз