Бәс тіккен туысым : қазақстандық мемлекеттік қызметтен босатылуын даулауға тырысты

Оралда мемлекеттік қызметші бәс тігу платформасындағы ставкаларды туысы жасағанын алға тартып, жұмыстан босатылуына қатысты сотқа шағымданды. Алайда сот ер адамды қызметіне қайта тағайындауға негіз таппады, деп хабарлайды Tengrinews.kz Батыс Қазақстан облыстық сотының баспасөз қызметіне сілтеме жасап.

Іс материалдарына сәйкес, ер адамның атына "Ж" букмекерлік платформасында аккаунт тіркелген. 2025 жыл ішінде бұл аккаунт арқылы жалпы сомасы 3,8 миллион теңгеден асатын 260 бәс тігілген.

Мемлекеттік қызметтен босатылғаннан кейін ер адам сотқа жүгінді. Ол бәсті өзі емес, аккаунтына рұқсат берген туысы тіккенін алға тартты. Талап қоюшы жұмыстан босату туралы бұйрықтарды заңсыз деп тануды, бұрынғы қызметіне қайта орналастыруды және моральдық зиян өтемақысын өндіруді сұрады.

Сот аккаунтқа кіру құқығын басқа адамға беру мемлекеттік қызметшіні заңда белгіленген шектеулер мен талаптарды сақтау міндетінен босатпайды деген қорытындыға келді.

Нәтижесінде сот барлық талап-арызды қанағаттандырудан бас тартты. Шешім заңды күшіне енді.

Қазақстанда 20 жылдық өтілі бар шенеунік лудомания кесірінен қызметінен айырылды

Бұған дейін Жетісу облысында екі шенеуніктің сыбайлас жемқорлыққа қарсы заңнаманы сақтамағаны үшін жұмыстан шығарылғанын хабарлаған болатынбыз. Олардың құмар ойындарға жүйелі түрде қатысуы жұмыстан босатуға себеп болған. Ойын шотын толтырудың жалпы сомасы 7,7 миллион теңгеден асқан.

Еске сала кетейік, Қазақстанда мемлекеттік қызметшілерге құмар ойындарға қатысуға тыйым салатын заң 2024 жылдың қыркүйегінде күшіне енді. Мемлекеттік қызметшілер, әскери қызметшілер, арнайы және құқық қорғау органдарының қызметкерлері, бюджеттік ұйымдардың басшылары құмар ойындар мен бәс тігуге қатыса алмайды. Бұл шектеуді сақтамаған жағдайда оларды жұмыстан босату көзделген.

Бізді Google-дың негізгі дереккөздер тізіміне қосыңыз