Бату хан туралы тарихи роман жазылып жатыр

Автор «Жошы хан» романын жазуға дайындық барысында төрт жылға созылған зерттеу еңбектерінің негізінде Шыңғыс заманы жайлы терең және тың деректердің ізіне түскен.

– Осы кітаптан кейін, араға аздап үзіліс тастап, жиналған тарихи деректер негізінде «Жошы хан» тарихи-деректі романының жалғасы іспетті «Бату хан» романын жазуға отырған едім. Бұйырса, алдағы қараша айында оқырманға жол тартады деген үміт пен жоспар бар. «Фолиант» баспасымен келісімшартқа отырып, редакциялық жұмыстары басталып та кетті. Бұл роман да әуелгі бағытым бойынша тарихи-деректі дүние. Одан соншама бір көркемдік пен қиял іздеп әуре болудың керегі шамалы дер едім. Оқырмандардың талабын ескере отырып, көп сөзге бой алдырмай, мүмкіндігінше сығымдап жазуға тырыстым. Нақты тарихи құжаттар мен деректерге, анық таңбаға түскен жазбаларға негізделген соң, «роман жазғанның жөні осы» деп артық қиялға бой ұрып, шын тарихтан алшақтап кетуді жөн көрмедім. Бағасын патша көңіл оқырманым өзі берер, – дейді жазушы.

Ол, сонымен бірге, алдағы уақытта осы желімен тарихи романдар сериясын жазуды жалғастыратынын айтты.

– Жошы хан негізін қалаған, Бату хан іргесін кеңейткен Алтын Орда дәуіріндегі даңқты хандар туралы тарихи романдар сериясын жазуды жоспарлағанмын. Қазір сол ойға алған арманымды жүзеге асыру жолында алға жылжып келемін, – дейді Ұларбек Дәлейұлы.

Еске сала кетейік, бұған дейін Алтын Орда туралы тарихи сериалдың ақтық кадрлары түсіріліп жатқанын жазған едік.