Батыс Қазақстанда қызылша індеті шарықтады: аурулар саны 17 есе артты

Батыс Қазақстан облысында қызылша жұқтырғандар саны күрт өсті. 2026 жылдың тоғыз айында инфекция 303 адамнан анықталған. Ал өткен жылдың осы кезеңінде 18 жағдай тіркелген. Ауырғандардың басым бөлігі – екпе алмаған балалар.

Сонымен қатар өңірде үш мыңға жуық ата-ана балаларына вакцина салдырудан бас тартқанын «Хабар 24» хабарлады.

Батыс Қазақстан облысының санитариялық-эпидемиологиялық бақылау департаментінің мәліметінше, қызылшаға шалдығу көрсеткіші 16,8 есе артқан. Ауырғандардың оннан тоғызы вакцина алмаған. Инфекция жұқтыру жағдайлары мектептерде де тіркеліп жатыр. Мұндай жерлерде ауру балалар арасында тез таралуы мүмкін.

Дәрігерлерді әсіресе екпеден бас тарту жағдайлары алаңдатады. Мамандардың айтуынша, кейбір ата-аналар мұндай шешімді интернеттегі жалған ақпараттың ықпалымен немесе діни себептерге байланысты қабылдайды. Дегенмен түсіндіру жұмыстары жүргізілгеннен кейін 600-ден астам ата-ана балаларын вакцинациялауға келісім берген.

Денсаулық сақтау басқармасының мәліметінше, жоспарлы вакцинациямен бір жастағы балалардың 85%-ы, ал алты жастағылардың 75%-ы қамтылған. Эпидемиологиялық ахуалдың нашарлауына байланысты облыста қосымша иммундау жұмыстары жүргізіліп жатыр. Биыл вакцина сатып алуға 9 млн теңге бөлініп, қосымша 3 мың доза алынған. Қазір қорда шамамен 15 мың доза бар.

Қызылша – дене қызуының көтерілуі, жөтел, мұрыннан су ағу және өзіне тән бөртпемен қатар жүретін аса жұқпалы вирустық ауру. Ауыр жағдайларда инфекция пневмонияға, жүйке жүйесінің зақымдануына және басқа да қауіпті асқынуларға әкелуі мүмкін.

Санитариялық қызмет мамандары қызылшадан қорғанудың негізгі жолы вакцинация екенін еске салады. Ауру белгілері байқалған жағдайда медициналық көмекке жүгіну қажет. Басқа адамдарға инфекция жұқтыру қаупін азайту үшін емханаға алдын ала телефон арқылы хабарласқан жөн.

Бүгін, 15:31