Бавария су қоймасынан жылына 1000 тонна ақ сутегін өндіру жобасы жүзеге асады

Геолог Юрген Грёчтың айтуынша, бұл газ Бавариядағы ормандарда табиғи түрде кездеседі. Ол бұрын Shell компаниясында жұмыс істеген, қазір ғалым ретінде қызмет атқарады. Көптеген кәсіпкер мен саясаткерлер сутекті экономиканы декарбонизациялаудың маңызды құралы ретінде қарастырады. Бұл газ атмосфераға зиянды шығарындыларды тудырмайды. Алайда, сутегін өндіру мәселесі өзекті болып отыр.

– Ал оны өндіру процесі негізінен қазба отындарына байланысты. Қазіргі уақытта сутегінің бір пайыздан азы жаңартылатын энергия көздерінен қымбат электролиз процесі арқылы өндіріледі. Ақ сутегі деп аталатын табиғи сутегі үшінші балама ретінде қарастырылуы мүмкін. Ол геологиялық процестер нәтижесінде, миллиардтаған жылдар бойы жер қыртысында қалыптасады, - дейді Грёч. 

Аталған маманның айтуынша, жер мантиясының көп бөлігі темірге бай жыныстардан тұрады. Бұл жыныстар 200-350 градус Цельсий температурада сумен әрекеттескенде, темір судан оттегін бөліп алып, таза сутегін қалдырады. Бұл процесс серпентинизация деп аталады және табиғи сутегінің пайда болу негізгі механизмі саналады.

Баварияда Юрген Грёч ақ сутегін килограмына 0,87 еуроға сатуды жоспарлап отыр, бұл қазба отынынан алынатын сутегінің бағасына жақын. 2030 жылға қарай ол жер астынан 1 500 метр тереңдікте орналасқан Бавария су қоймасынан жыл сайын 1 000 тонна ақ сутегін өндіруді көздейді. Бұл сутегі жергілікті кәсіпорындар мен орталықтандырылған жылу жүйелерінде қолданылуы мүмкін.

– Сонымен қатар сол су қоймаларынан үйлерді жылытуға арналған ыстық су алу мүмкіндігі де бар. Бұл табиғи сутегін пайдалану экологиялық таза энергия көздерін дамытуға ықпал етуі мүмкін, - дейді маман. 

Еске сала кетейік, бұған дейін Германияда жанармай бағасын күніне бір рет қана көтеруге рұқсат берілуі мүмкін екенін жазған едік.