Базардағы баға тұрақты

Жаңа жылда қарабалас күшейеді. Бірі жақын-жуығына сыйлық алып сабылса, енді бірі мерекелік дастарханның қамымен әуреге түседі. Осы ретте арна тілшілері елордадағы базарлардың біріне барып, сауданың көрігін қыздырған қауыммен тілдесіп қайтты.

Демалыс күні болса да, базардағы тірлік қыз-қыз қайнайды. Таңнан сөмке-қапшығын арқалап жеткен үлкен-кішінің қарасы қалың. Бұл саудада береке бар деп білетін кәсіпкерлер үшін тиімді. Саудагерлер де осы шақты қалт жібергісі келмегендей, таң алакеуімнен қызу жұмысқа кіріскен. 

Айжан Шабданова, саудагер:

- Картопты 230 теңгеден сатып жатырмыз. Пияз ше? Пияз 200 теңгеден. Алып келіп жатқан бағамыз 195 теңдеген. Көлеміміз 30 қап. Күніне 15 қап кетеді. Жақсы болып жатыр саудамыз. 

Сұранысқа – ұсыныс демекші, ет, көкөніс, жеміс-жидектің түр-түрі сөрелерде самсап тұр. Ал халықтың әлеуметтік осал тобы үшін кейбір азық-түлік түріне жеңілдіктер қарастырылған. 

Әділет Сағындықов, саудагер:

-  Жаңа жылға арнайы 2-3 күнге арнайы тауарды көп алып келіп қоямыз. Барлығына жетсін деп. Май, қарақұмық, сүт, тұз, жұмыртқа 15 пайыздан бәрі бар. Қант таусылып қалды. Зейнеткерлерге, жағдайы төмен кісілерге қолжетімді баға ретінде қойып қойғанбыз. 

Десе де бұқараға базардағы баға маңызды. 

Қалада жаңа жылдық қарбалас әлі біте қоймаған сыңайлы. Мұндайда оңтайлы сәтті пайдаланып, оңай олжа көргісі келетіндер табылады. Сондықтан бүгінде елде азық-түлік бағасына бақылау күшейтілді. 

Авторлары: Назерке Тоқжан, Самат Қазанбаев