Бектенов базардағы делдалдарға қатысты тапсырма берді

АСТАНА, 14 сәуір – Sputnik. Премьер-министр Олжас Бектенов базардағы делдалдарға қатысты тапсырма берді, деп хабарлайды Sputnik Қазақстан тілшісі.

Үкімет әлеуметтік маңызы бар азық-түлік бағасын негізсіз өсіруге қарсы шараларды жалғастыруға мүдделі. Ал сауда министрлігі ішкі нарықты отандық өнімдермен толықтырып қана қоймай, делдалдық схемаларды да анықтауға міндетті. Осы шаралар күшейтіледі.

"Жасыратыны жоқ, ол жерлерде ел айтып жүргендей, "ұйымдасқан топтар" заңсыз әрекет етеді. Көкөніс, жеміс-жидек, ет және басқа да өнімдердің бағасы ешқандай негізсіз, қолдан көтеріледі. Міне, осыны нағыз делдалдық схемалар деп айтуға болады", - деді Бектенов министрлер кабинетінің бүгінгі отырысында.

Премьер сауда министріне осы мәселемен нақты әрі жүйелі түрде айналысуды тапсырды. Оған ішкі істер министрлігімен, мемлекеттік кірістер комитеті мен бәсекелестікті қорғау агенттігі де жауапты болады.