Бейбіт күннің батыры

Қауіп пен қатердің ортасында өзгенің өміріне араша болатын құтқарушы әрдайым алдыңғы шепте жүреді.

Солардың бірі - Семейдегі Қасым Қайсенов атындағы әскери бөлім қызметкері - Мират Бекетов. Ол былтыр Бесқарағай ауданында болған су тасқынында төрт адамның өмірін сақтап қалды. Халықты қауіпсіз жерге көшіруге атсалысты. 

Қазір мен тұрған қайық «Марлин» деп аталады. Осы қайықпен біз Ертіс өзенінің бойымен жүзіп келеміз. Құтқарушылар шомылу маусымынан бастап, күзге дейін осы аумақты бақылауды тоқтатпайды. Мұндағы мақсат судағы қауіпсіздікті қамтамасыз ету және төтенше жағдайлардың алдын алу.

Жылда шомылу маусымы басталысымен Мират Бекетов Ертіс бойындағы қауіпсіздікті қадағалауға шығады. Былтыр ол өзен ағысы алып кеткен жеті жасар бүлдіршіннің өміріне араша түсті. Құтқарушы бұл ісін ерлікке баламайды.

Мират Бекетов, 68303 әскери бөлімінің взвод командирі:

- Төтенше жағдай кезінде адамның денсаулығына, өміріне қауіп төнген жағдайда тез арада шешім қабылдау қажет болады. Өйткені біздің іс қимылымыздан адамның денсаулығы мен өімірі байланысты. Мұндай жағдайларда қорқыныш ол табиғи сезім болған соң, әр адамда қорқыныш болады. Бірақ біздің мамандығымыз сол қорқыныш сезімін жою болып табылады.

Мират Бекетовтың әскери салада жүргеніне 14 жыл өтті. Осы уақытта бірнеше адамды өлім аузынан құтқарды. Былтыр өңірде болған су тасқыны кезінде 60 адамды қауіпсіз жерге көшіріп, гуманитарлық көмек тасымалдаған. Әскери қызметкердің ерлігі әріптестері мен жас сарбаздарға үлгі.

Алтынбек Салтай, 68303 әскери бөлімі Арнайы құтқару жұмыстары ротасының командирі:

- Мират Бекетовпен 2019 жылдан бері бір ұжымда әскери қызмет атқарудамын. Ол ең алдымен адамгерішілігі жоғары, әскери  жағынан табанды шешімдерді тез қабылдайды. Командир ретінді жеке құрамға жақсы қарап, қамқорлық жасайды. Өзінің әскери қасиеттерін табандылықпен үйретуде. Төтенше жағдайлар министрлігінің 30 жылдығымен және құтқарушылар күнімен барлық әріптестерімді шын жүректен құттықтаймын.

Қасым Қайсенов атындағы 68303 әскери бөлімде 500–ден астам әскери бар. Қазір 150-ге жуық сарбаз мерзімді әскери борышын өтеп жүр. Бәрі міндеттеріне жауапкершілікпен қарап, жауынгерлік және қызметтік даярлық деңгейін жоғары деңгейде ұстап келеді.

Самат Берсембаев, 68303 әскери бөлімі командирінің міндетін атқарушы:

- Жеке құрамға қолайлы жағдай жасалған. Асхана, заманауи спорт залдары, монша және медициналық көмек қарастырылған. Әскерилердің спортпен айналысуына, мәдени шараларға белсенді қатысуына мүмкіндік бар. Нағыз әскери адам болу - тек кәсіби дайындықпен шектелмейді. Бұл мінез беріктігін, темірдей тәртіп пен жауапкершілікті, адалдық пен табандылықты талап ететін қасиетті міндет.

Президент жарлығымен қызметтік борышын атқару барысында көрсеткен жанқиярлығы мен ерлігі үшін Мират Бекетов «Ерлігі үшін» мемлекеттік медалімен марапатталды. Қауіп-қатерге қарамай, өз өмірін тәуекелге тігіп, өзгелердің өміріне араша түсу оның өмірлік ұстанымына айналған.

Авторлары: Рүстем Қайратұлы,Мәди Базарбеков