“Бірдеңе ата бастады“. Павлодардағы фитнес клубта қазақстандық әйел тірідей жанып кете жаздады

Павлодардағы фитнес-клубтардың бірінде келуші қыздың сөмкесіндегі портативті аккумулятор жарылып кетті. Қыздың бетін, қолын және денесін қатты күйік шалған, деп хабарлайды Tengri Life.

Павлодардағы фитнес-клубтардың бірінде келуші қыздың сөмкесіндегі портативті аккумулятор жарылып кетті. Қыздың бетін, қолын және денесін қатты күйік шалған, деп хабарлайды Tengri Life.

Не болды?

Павлодар тұрғыны Диляра 14 маусымда фитнес-залға келген. Жаттығуын аяқтаған соң, жиенін алып, түскі ас ішуге аттанған.

"Жолда штативимді ұмытып кеткенім есіме түсті. Басында қайтқым келмей, ертең алармын деп ойладым, бірақ жиенім дәл қазір барып алайық деп қоймады", - дейді ол.

Бұл шешім Диляраны бұдан да ауыр зардаптан сақтап қалған болуы мүмкін - жарылыс көлік ішінде немесе үйде емес, адам көп жиналған жерде болды. Оқиға қыз ішке кіру үшін аяқ киімін ауыстырып жатқанда, ресепшнде болған.

"Телефонымды диванға қойып, тәпішкемді кие бастағаным сол еді, кенет бірдеңе тарс-тұрс ете қалды. Не болып жатқанын түсінбедім. Айнала жым-жырт, тек әлгі жарылыстың дыбысы шығады. Сол сәтте өз сөмкемнің өртеніп жатқанын аңғардым", - деп бөлісті қыз.

Сөмке иығында асулы тұрған. Жалынның тез өршіп бара жатқанын көрген Диляра оны үстінен жұлып алуға тырысқан. Жанып жатқан затты жерге лақтырып жіберіп, өзі шетке қашқан. Қызға фитнес-клуб қызметкерлері көмекке ұмтылған.

"Қызметкер бірден өртсөндіргішпен сөндіре бастады, бірақ сөмке бет қаратар емес. Соңында оны далаға шығарып тастап, сол жерде әрең дегенде сөндірді", - деді ол.

Кейін фитнес-зал әкімшілігі жедел жәрдем шақырған. Диляраның айтуынша, ол алғашқы минуттарда жарақатының қаншалықты ауыр екенін сезбей, тіпті ауруханаға барудан бас тартпақ болған.

"Клуб әкімшілігі бірден жедел жәрдем шақырды. Дәрігерлер бес минуттың ішінде жетіп, жарамды өңдей бастады. Мен жағдайдың қаншалықты күрделі екенін толық түсінбедім, тіпті жедел жәрдем шақыруға қарсы болдым. Бірақ айнадан өз бейнемді - күйіп кеткен шаштарымды көргенде, еңіреп жылап жібердім", - деп атап өтті ол.

Дәрігерлер зардап шегушіні күйік орталығына жеткізген, алайда кейін ол емді ата-анасының қарауында, үйде жалғастыруды жөн көрген.

"Өте қатты ауырды, қолым лапылдап жанды, оның үстіне даладағы аптап жағдайды қиындата түсті. Мені бірден ауруханаға жатқызбақ болды, бірақ мен бас тарттым: аурухананы ұнатпаймын, маған анамның қасында, үйде болған жақсы", - дейді Диляра.

Қыз қандай жарақат алды?

Тілсіз жау денесіне де жайылып үлгерген.

Диляраның айтуынша, оның:

шашы күйіп кеткен; қасы мен кірпігіне зақым келген; сөмке асулы тұрған жақ бүйірі қатты күйген; қолтық асты, екі алақаны мен оң жақ білегі күйіп қалған; іш тұсы зақымданған.

Диляра фитнес-клуб қызметкерлеріне алғысын білдірді: оның айтуынша, егер олар өртсөндіргішпен дер кезінде көмекке келіп, дәрігерлерді шақырмағанда, салдары бұдан да қорқынышты болар еді.

"Фитнес-клуб қызметкерлеріне өте ризамын. Олар бірден өртті сөндіруге кірісіп, жедел жәрдем шақырды", - деді ол.

Зардап шегуші қандай қауіп туралы ескертті?

Диляра портативті аккумулятор қолданушыларға сақ болуды ескерту үшін өз оқиғасын айтып беруді жөн көрген.

Ол келесідей кеңес береді:

пауэрбанктерді мұқият таңдап, күмәнді құрылғыларды сатып алмау; құрылғының корпусында сызат пен зақымның бар-жоғын үнемі тексеріп отыру; ісінген немесе деформацияланған аккумуляторлардан бірден құтылу; электрониканы күн көзінде, көлік ішінде немесе қатты қызып тұрған бөлмелерде қалдырмау.

Бұл мұндай алғашқы жағдай емес. Былтыр Алматыда жасөспірімнің қалтасында пауэрбанк жарылып кеткен болатын. Ол денесінің 20 пайызы зақымдалған IIIБ дәрежелі күйік алған.

Тағы оқыңыз: Танымал гаджет ұшақта өртенуі мүмкін - ғалымдар себебін түсіндірді

Google News арқылы жаңалықтарымызды қадағалаңыз

Жазылу