Бішкекте Қазақстан туралы көрме ашылды

Бішкекте «Ғасырлар ізімен: Қазақстан тарихының бейнесі» атты көрме ашылды.

Қырғызстан Ұлттық тарихи мұражайында ұйымдастырылған көрмеде қазақ мемлекеттілігінің қалыптасуы туралы бағалы жәдігерлер мен фотоқұжаттар қойылған.

Көрмеде Қазақстан мемлекеттілігінің қалыптасу кезеңдері қамтылған. Олар бірнеше бөлімге бөлініп, әрқайсысы түпнұсқа құжаттармен расталған. Бұл кезеңдердің тарихы 19 ғасырдың ортасынан 20 ғасырдың соңына дейінгі уақыттан сыр шертеді. Көрмеде сол кезеңдегі маңызды реформалар көрсетілген. Мұнда өнеркәсіптің дамуы, елді жаппай индустриализациялау және ауыл шаруашылығында ұжымдастыру сияқты оқиғалар баяндалады. 

Бактыбек Секимов, Қырғызстан мәдениет, ақпарат, спорт және жастар саясаты министрінің кеңесшісі:

- Бұл көрмеде Қазақстанның тәуелсіздікке жету жолы туралы барлық ақпарат бар. Ел қандай мәселелермен бетпе-бет келіп, қандай қиындықтарды бастан өткергені көрсетілген. Сондай-ақ тарихқа енген батырлар мен қарапайым адамдар туралы көп дерек бар. 

Ерекше орын алған жәдігерлер қатарында қазақ мәдениетінің ұлы тұлғалары – Абай Құнанбаев, Жамбыл Жабаев, Дина Нұрпейісова және Кенен Әзірбаевтың музыкалық аспаптарының көшірмелері бар. Олар тарихи құндылық қана емес, сонымен қатар қазақ музыкалық мұрасы мен мәдени дәстүрлерінің сабақтастығы, рухани байлығының дәлелі, - дейді ғалымдар.

Аманжол Қалыш, тарих ғылымдарының докторы:

- Қазақстандағы алғашқы мұражайдың жәдігерлерін жеткізгенімізге қуаныштымыз. Бұл мұражай XIX ғасырдың 30-жылдарында ұйымдастырылған. Қазақстан мұражайы деп аталып, Орынборда, біздің алғашқы астанамызда орналасқан. Кейін Қызылордада болды, ал 1925 жылы Алматыда орналасты.

Бірегей көрме Қазақстан Республикасының Мәдениет және ақпарат министрлігі, Ұлттық орталық музей және Қазақстан Республикасының Қырғызстандағы елшілігінің қолдауымен ұйымдастырылды. Қырғыз тарапынан Мәдениет, ақпарат, спорт және жастар саясаты министрлігі атсалысты. Бішкек мұражайындағы іс-шара 14 қарашаға дейін жалғасады.

Нұрбике Жігер, Бакыт Чермашев