Биыл елімізге 8,6 млн шетелдік турист келген

Қазақстанға қызығушылық танытқан туристер қатары артып келеді. Биыл 9 айдың өзінде елімізге 12 млн-нан аса мейман келген. Оның 9 млн-ға жуығы - шетел азаматтары.

Қазақстанның тұмса табиғатымен танысқысы келетін саяхатшылар саны 10 пайызға ұлғайып, нәтижесінде ел қазынасына 260 млрд теңгеден астам қаражат түскен. Отандық туризм саласының тағы қандай жаңалығы бар? 

Мыңжылдық мұзға оранған қарт Алатаудың мұзарт шыңын көруге аңсары ауған туристер сапы жылдан жылға артып отыр. Мәселен, қаңтар айынан бері 8 млн 600 мыңнан аса шетелдік азамат Астана, Алматы қалаларын, Маңғыстау, Ақмола және Түркістан облыстарын аралаған. Дені Қытай, Үндістан, Германия, Жапония, Оңтүстік Корея мемлекеттерінен және көршілес елдерден келген.

Венера Мұстафина, «Kazakh tourism» ұлттық компаниясы АҚ ресми өкілі:

- Биылғы жылы Қазақ туризм басымды 5 нарықта, оның ішінде Жапония, Қытай, Оңтүстік Корея, Европа, Ресей елдерінде Қазақстанның ұсынылуын зерттеген болатын. Оның ішінде Қазақстанға турларға көп мән берілді. 5 мемлекетте Қазақстанға мыңға жуық тур болды. Бұл 2003 жылмен салыстырғанда 3 есе артық екені байқалады.

Бұған визалық жеңілдектердің енгізілуі мен еліміздің халықаралық нарықтағы беделінің өсуі ықпал етіп отыр. Соңғы уақытта Шығыс Қазақстан өңірінің табиғаты да саяхатшылар назарына іліккен. Қатонқарағай ауылын, Рахман қайнарын көріп, «Бүркіт төбе» елді-мекеніндегі саятшылар сайысын тамашалауға ағылатын туристер аз емес. Олардың қатарында франциялық фототілші Мишель Нейру да бар.

Мишель Нейру, Франция фототілшісі:

- Өте керемет шара екен. Бұған дейін Сібірде және өзге де жерлерде болдым, бірақ Қазақстанда көшпенділер мәдениетін бұлай айна-қатесіз ерекше етіп, көруге болатынын білмеппін. Маған саятшылық өнер қатты ұнады.

Нұрбол Байжанов, Туризм индустриясы комитеті төрағасының орынбасары:

- Қатонқарағай жақта қазіргі уақытта жеңіл глэмпингтер салынып жатыр. Өйткені ол жақтың инфрақұрылымын қазір дамыту жұмыстары жүргізіліп жатыр. Ол жақта аэропорт салынып жатыр. Одан бөлек ірі кәсіпкерлер санаторий, қонақ үй сияқты объектілерін жоспарлап жатыр.

Министрлік дерегіне сенсек, ішкі туризм бойынша өсім, өткен жылмен салыстырғанда шамамен 7 пайызға жеткен. Қаңтар-қыркүйек айлары аралығында 7 млн-ға жуық азамат ел ішін аралап, оның 2,8 млн-ы ұлттық парктердің жұмысымен танысқан.

Ішкі туризм – 6-7%

Қаңтар-қыркүйек – 6,7 млн азамат

2,8 млн азамат – Ұлттық парктерге барған

Нұрбол Байжанов, Туризм индустриясы комитеті төрағасының орынбасары:

- 2023 жылғы ҚР Туристік саласын дамытудың 2029 жылға дейінгі тұжырымдамасы қабылданған болатын. Сол тұжырымдаманы жүзеге асыру әрі қарай жалғасты. «Щучинск-Бурабай» аймағын дамыту бойынша кешенді жоспарды наурыз айында қабылдадық. Одан кейін Маңғыстау аймағын дамыту бойынша кешенді жоспарды маусым айында қабылдадық және Алматы тау кластерін дамыту бойынша кешенді жоспарды әзірлеп, қазір қабылдау жоспарларын жүргізіп жатырмыз.

Бұған сәйкес, Семей, Алматы өңірінде 4,5 мың адамды қамтитын қонақ үй кешендері, туристік базалар салынып, глэмпингтер ашылды. Ой-қарағай демалыс орнында 12 шақырымдық аспалы көпір ашылып, Алматыда ауқымды деңгейде дрифт шоу ұйымдастыруға мүмкіндік беретін үлкен кешен бой көтерді. Нәтижесінде бюджетке 268 млрд теңге көлемінде қаражат құйылған. Келер жылы Байқоңыр қаласына премиалды турлар ашу да жоспарланып отыр.

Асылхан Есілов, Туристік «Қамқор» қорының директоры:

- Туристік «Қамқор» жүйесі арқылы біздің ең ірі туроператорлар. 65 туроператорлар мықты түрде өз туристтеріне жаңа бағыттарды дайындап жатыр. Осы қаңтар-ақпан айларында біз жаңа бағыттар туралы естиміз.

Ал шетелге демалуға шыққан қазақстандықтар саны бойынша биыл рекордтық көрсеткіш тіркелді. 1 млн 700 мыңнан аса отандасымыз Вьетнам, Түркия, Біріккен Араб Әмірліктері, Қытай халық республикасы, Мысыр және Еуропа елдеріне саяхаттаған.

Авторлары: Назым Кенжебай, Нұрғали Мамырбаев, Жандос Битабаров