Болмаған дүкендер: CVK пирамидасын ұйымдастырушы мерзім алды

Қарағанды облысында CVK қаржы пирамидасының құрылымдық бөлімшесін ұйымдастырушы сотталды. Салымшылардан виртуалды дүкендер сатып алу үшін деген желеумен криптовалюта түрінде ақша жиналған, деп хабарлайды Tengrinews.kz Қаржылық мониторинг агенттігіне сілтеме жасап.

Қаржылық мониторинг агенттігі баспасөз қызметінің ақпаратынша, жобаға қатысушыларға құны 120-дан 49 мың долларға дейін болатын виртуалды дүкендерді сатып алу ұсынылған. Ақшаны USDT криптовалютасымен салу қажет болды.

Оның орнына салымшыларға күнделікті табыс, сондай-ақ жаңа қатысушыларды тартқаны үшін қосымша бонустар уәде етілген.

Алайда, агенттік мәліметінше, виртуалды дүкендерде сатылады-мыс делінген тауарлар іс жүзінде болмаған. Қатысушылардың табысы жаңа салымшылардан түсетін ақшаға тікелей байланысты болды.

Ақша OKX криптовалюта платформасы арқылы электронды әмияндарға USDT түрінде аударылып отырған.

Тергеу барысында 474 мың USDT сомасындағы криптоактивтерді бұғаттау мүмкін болған - бұл шамамен 212 миллион теңге.

Қаржы пирамидасының құрылымдық бөлімшесін ұйымдастырушы С. Ш. Қайырбаев екі жылға бас бостандығын шектеу жазасына кесілді. Бұғатталған 212 миллион теңгенің цифрлық активтері мемлекет пайдасына тәркіленді.

Үкім заңды күшіне енді.

Бізді Google-дың негізгі дереккөздер тізіміне қосыңыз