Боран: Абай облысында полицейлер 300 ден астам көлікті өткізді

Республикалық маңызы бар «Омбы-Майқапшағай» тасжолының 666-733 шақырым аралығында қалған автотізбекті бірреттік өткізу ұйымдастырылды. Бұл туралы Абай облыстық полиция департаменті хабарлап отыр.

Жалпы саны 300-ден астам автокөлік, оның ішінде 189 жеңіл және 126 жүк көлігі өткізілген. 

— Автотізбек патрульдік полиция экипажының және жол қызметтерінің арнайы техникасының жол бастап жүруімен Бесқарағай ауылынан Семей қаласы бағытына шықты. Қозғалыс боран мен көріну қашықтығының шектелуі жағдайында тәуекелдерді азайту мақсатында, полиция қызметкерлерінің толық бақылауымен, ұйымдасқан түрде жүзеге асырылды, — делінген ақпаратта. 

Еске салсақ, осыған дейін ШҚО-да полицейлер 80-нен астам көліктен тұратын автотізбекке жол бастап жүргені хабарланған.