БҚО: Бөрлі ауданында әлеуметтік нысандар қолданысқа берілді

Батыс Қазақстан облысының Бөрлі ауданында 3 бірдей әлеуметтік нысан ел игілігіне пайдалануға берілді.

Жарсуат және Кеңтүбек ауылдарында спорт кешені ашылса, Ақсай қаласында 300 орындық мектеп тапсырылды. Жаңа білім ордасы «Келешек мектептері» ұлттық жобасымен салынды.  

Соңғы үш жылда өңірде 13 спорт нысаны пайдалануға берілсе, алтауының құрылысы жүріп жатыр. Нәтижесінде халықты спорттық инфрақұрылыммен қамту көрсеткіші 66-дан 76-ға дейін өсті. Спортпен қысы-жазы шұғылданып, денсаулығын шыңдауға мүмкіндік алғандардың қатарына енді Кеңтүбек халқы да қосылды. Жаңа кешеннің құны 700 млн теңге. Енді ауыл жастары футбол, волейбол және жекпе-жек түрлерімен айналыса алады. Мыңнан аса тұрғыны бар ауылда бұрын спорт залы болмаған. 

Ақниет Хамит, оқушы: 

- Біз өте қуаныштымыз. Ұзақ уақыт күттік осыны. Фитнес залы бар, волейбол ойнауға болады. Бұрын спортпен айналыспадық. Зал жоқ, жарысқа барғанда Ақсайға, Бөрліге барып жүрдік. 

Ақсайда ашылған 300 орындық білім ордасы «Келешек мектептері» ұлттық жобасымен салынды. Оқу орнында 28 пән кабинеті, дизайн-технология, робототехника, инклюзив кластары мен хореография залы қарастырылған. Оқушылардың шығармашылық және техникалық қабілетін шыңдауға арналған шеберханалар, коворкинг алаңдары, кітапханасы бар. Барлық сынып жаңа үлгідегі интерактивті тақтамен жабдықталды.

Санжар Бисенғали, оқушы:

- 21 ғасырға байланысты барлық жағдай жасалған. Бұл біз үшін емес, болашақта оқитын оқушылар үшін өте керемет жаңалық. Рахмет айтам, осы мектепті кім салдырды, біздің президентке алғысымды білдірем. Оқуға құштарымыз ашылып келе жатыр.   

Тілеуғали Мұсағалиев, қала тұрғыны: 

- Немерем осында оқитынына қуаныштымын. Бұл мектептерде балалардың оқуына мүмкіншілік бәрі жасалған, барлық кластар әзірленген. Бұл мектепте жаман оқу мүмкін емес. Тек жақсы оқу керек. 

«Келешек мектептері» жобасы аясында Бөрлі ауданында 2 мектеп пайдалануға берілді. 13-шағын ауданда салынып жатқан 900 орындық үшінші білім ордасы жақында   тапсырылады. Сонда үш ауысымда оқытатын №7 мектеп мәселесі шешіледі. Дегенмен, ауданда әлі 4 мектепке  қажеттілік бар.

Айымгүл Тұржанова, Бөрлі аудандық білім бөлімінің басшысы: 

- Болашақта жаңа мектептер салу жоспарда бар. Ол апатты Кеңтүбек ауылында мектеп салу, Қанай және Облавка мектептерінде. Қазіргі таңда 3 ауысымда оқып отырған 3 мектебіміз бар және апатты 1 мектеп. №6 мектеп проблемасын болашақта шешеміз деп жоспарда. 14 ықшам ауданда қасында орналасқан 1200 орындық мектеп салу жоспарлануда. Әзірге тек қана жер теліміміз бар. Ол енді болашақтың еншісінде. 

Соңғы үш жылда облыста 10106 орынға 29 мектеп салынды. Нәтижесінде 11 апатты, 6 үш ауысымды және  бейімделген ғимаратта білім алатын 12 мектеп мәселесі толық шешілді. 

Е. Жылқайдарұлы, Б. Жарылғасов, Э. Аюпов